479
Diasabra ultimo, 9 di september, e desenlace final dje prestigioso copa di biyar bola 8 pa 60 plus, titula “Jani Brokke Memorial Tournament”, a tuma luga n’e palacio di biyar na Tanki Leendert. Un desenlace cu mester bisa a bay n’un forma dramatico, spectacular, y sensacional!
Na cuminsamento di anochi tabata falta ainda pa pone algun “puntjes op de i” prome cu e gran final mes por a cuminsa. Den loser’s round, dos legendario, Edwin “Kwek” Chirino y Buchi Briezen, ta topa otro, caminda Buchi a ripara cu su tanki di gasolin marca “di nos e ta” tabata falta net algun galon mas, y Kwek ta probecha pa pasa p’e siguiente rondo. Siguientemente, Kwek Chirino ta topa cu nada menos otro djaka di caña, “Sneaky” Sheik Orman kende a caba di manda subcampeon 2022, Junini Quant, cas. Kwek ta demostra caliber legendario y ta manda Sheik bek p’e santo di Sahara.
Den winner’s round, Patrick Henriquez ta sinta warda comodamente riba ken e lo mester enfrenta den final, Kwek Chirino of Gino “Beton” Geerman. Den un wega sumamente emocionante, Kwek Chirino ta haci un “slippertje” net na mal momemto riba e bola 8! Publico a bay laira c’un grito di “no puede ser”! Gino mes no por kere, pero ya, esey ta haci biyar e deporte mas cruel na mundo. C’un bon tiro, Gino ta sink bola 8 y duna Kwek su ontslagbrief op staandr voet!
Ban p’e gran final entre Gino “Concret” Geerman versus Patrick “The Silent Killer” Henriquez! Den un forma convincente, Gino Geerman ta pika 1-0 dilanti, pero locual a bin despues ni na Hollywood nan por a pensa. E palacio di biyar ta bira keto keto, y leu leu bo ta tende un fluistermento “sssst … ssst… Capoti … e ta bay dun’e Capoti”. Patrick Henriquez den un Zen Zone total ta pasa Gino Geerman un Capoti.
Ban p’e rack decisivo! Aki no a dura mucho cu e luga a bolbe cay den un silencio di incredibilidad y e murmuronan “ssssst! Di dos capoti… e ta bay dune un capoti mas!” a cuninsa zweef rond “in de wandelgangen”! Boedoem! E bola 8 ta sink y Gino y ful publico no por kere … Patrick Henriquez ta pasa legendario Gino Geerman, campeon 2022, dos Capoti tras di otro! Na un forma convincente, Patrick ta demostra ta pakico nan ta yam’e “The Silent Killer”! Un tremendo y spectacular final p’e prestigioso torneo “Jani Brokke Memorial 2023” biyar bola 8 pa 60 plussers. Ora a puntra Patrick ta con e por a logra un hasaña asina bou e presion enorme ey, el a contesta cu pa basta tempo el a siña hala rosea mescos c’un Cabayero Jedi di Star Wars, y cu tambe e ta bezig ta siñando con pa uza “The Force” ora e posicion dje bolanan mester “schuif” un tiki,
… Shonnan, keda pendiente, otro aña ta bay tin “carni nobo” den e grupo di 60 plus! Un danki grandi na e organisador Movemento ta Bida, y te otro aña.