CAMPEONATO DI BILJART 60+ TA DEN FUL SWING!

by Jessica Krozendijk
454 views

Tanki Leendert – Diasabra ultimo, 26 di augustus, e candeloso torneo di biyar bola 8 pa
esnan 60-plus titula “Jani Brokke Memorial Tournament” a cuminsa den ful swing aya
n’e palacio di biyar na Tanki Leendert. E torneo anual aki, organisa pa Fundacion
Movemento ta Bida, un biaha mas a logra trece e crème de la crème di e hungadonan
veterano den biyar, pa dje forma aki dicidi con ta bay “separate the boys from the men”!
Patrick Henriquez ta haya un vrij lot den prome buelta y ta sigui pa enfrenta nada
menos cu “Sheik” Orman, kende a caba di suta Mario Maduro. Sheik su bateria ya no ta
di confia mas y Patrick ta sigui facilmente pa di tres ronde. N’un otro mesa tur cos ta
mustra cu tin un posibel caso di “conspiracion”! Aki e organisadonan a “fix” p’e dos
duronan di “e luga caminda abo no ta wak nan, pero nan si ta wak bo” cay contra otro:
“Lucky” Viviano vs Juni “Kilowatt” Figaroa! Aki Juni ta probecha rapidamente di e “AO”
di Lucky, y ta bay di biaha enfrenta legendario Buchi Briezen, kende – atrobe – a bari
mop mesa cu Ernesto Pardo! Na otro mesa, Rudolf Arends ta perde dje campeon
actual Gino Geerman, kende ta sigui di biaha cu gana Omar Lampe, esun c’un rato
prome a gana Moonchi Kelly. Otro trabuco, Junini Quandt, ta gana Mr. Frenzo, Franklin
Ruiz, pa despues gana “the living legend” Edwin “Kwek” Chirino y sigui na bida den
winner’s round.
Diasabra awo, 2 di september, cuminsando pa 6’or di atardi aya n’e palacio di biyar na
Tanki Leendert, un tabla lo bula di segundo piso ora cu Patrick Henriquez enfrenta nada
menos cu “The Pardo Slayer” Buchi Briezen, y na otro mesa e campeon 2022, Gino
“Beton” Geerman, enfrenta e sub-campeon 2022, esta Junini Quandt, pa wak kendenan
lo bay p’e gran semi-final den winner’s round. N’e otro bracket, esta di loser’s round, e
caminda ta laaaargo ainda pa Lucky Viviano ora e enfrenta Ernesto Pardo, Rudolf
Arends enfrenta Moonchi Kelly, Franklin Ruiz enfrenta Coffi, y Mario Maduro enfrenta
Edwin “Kwek” Chirino. Pues shonnan, diasabra awor, 2 di september, cuminsando pa
6’or di atardi ne’ palacio di biyar na Tanki Leendert, e di dos buelta ta sigui dje
candeloso torneo biyar bola 8 pa 60-plus, e famoso Jani Brokke Memorial Tournament”
organisa pa Fundacion Movemento ta Bida. Entrada ta completamente gratis pa pueblo
en general bin goza.

Related Articles

297 Sports is a sport news website based in Aruba – 297 is the country code. We cover all domestic – and international sport news where Arubans are involved. 297 Sports is the leading provider of sport news in Aruba. It is run by Seever Krozendijk. Contact us for news coverage or for advertising on our website.

EMAIL
info@297sportsaruba.com

©2022. 297 Sports Aruba. All Rights Reserved. Designed and Developed by FM Web Designs