Diadomingo tabata un dia grandi y historico ora cu pa prome biaha nos a haya un grupo di para-atleta ta participa hunto den un solo evento deportivo. Un di e atletanan aki tabata Casiene Tromp mescos cu e legendario coredor Beto Maduro ta un persona visualmente incapacita, cu otro palabra ciego. No obstante di esaki, Casiene cu ta gusta landa algun luna atras a tuma e reto di participa na e Aruba Int’l Triathlon despues cu Beyond Sports Limit Foundation di Brainer Lampe riba invitacion a duna un charla na Fundacion FAVI, cual fundacion ta traha pa hendenan cu problema di bista. Den e Aruba Internacional Triathlon, Casiene a participa den e categoria Sprint unda e mester a landa 750 meter, core bais 20 kilometer y despues core na pia 5 kilometer. Un trajectoria sigur no facil ya cu henter e weekend e biento tabata fuerte y e lama cu hopi coriente.
Con tur cos a inicia
Beyond Sport limit foundation a wordo invita door di un studiante di EPI, cu tabata stage na Favi pa su eindproject pa bin duna un motivational speech hunto cu Disjondrick Jacobs. Aki nos a sera conoci cu Casiene Tromp cu tabata hopi interesa den e deporte di triathlon. Asina e idea a bin pa e tambe por participa den un evento di triathlon mescos cu Disjondrick. Di eynan a sinta cu su 2 begeleidersnan Meredith y Annemarie pa plania e preparacionnan pa e dia di careda. Casiene tabata determina pa logra su meta y asina tur e entrenamentonan di algun luna a cuminsa.
Di Judo pa Triathlon
Ta bon pa bisa aserca cu Casiene Tromp ta un persona cu gusta deporte ya cu 7 anja pasa nos di 297sports tabata tin e privilegio di por a mira Casiene bringa algun combate den e deporte di judo esaki den un torneo na Aruba Juniors. E anja ey nos a scirbi un reportahe special riba Casiene mirando cu pa prome biaha un atleta visualmente incapacita a participa den un combate di judo. Despues di 7 anja nos a encontra Casiene bek pero awor den un otro ramo di deporte esta Triathlon. Mas cu claro nos a keda masha content di por a mira cu apesar di tur cos, Casiene a keda active den deporte.
Casiene su careda den triathlon
Den un combersacion sosteni cu Brainer nos a saca e siguiente compilacion di e careda di Casiene den e categoria Sprint unda Casiene ta logra crusa e meta final den pa nos un hazanja unico.
E prome parti esta landamento tabata tin basta coriente cu no tabata den Casiene su bentaha pero toch e la supera esaki. Riba bicicleta tabata esun cu a bay mas mihor di tur tres y esun cu Casienne a gusta mas. Tabata tin un bon comunicacion cu su guia y coach Brainer, ki ora mester baha velocidad, ki ora ta bay lora ect. Y por ultimo tabata core na pia esta e 5 km unda Casiene a surprise su coach Brainer con motiva e tabata pa yega e final maske cu e tabata hopi cansa y agota. Segun coach Brainer e apoyo cu Casiene a haya durante careda tabata un motivacion grandi pe y bo por a wak e con e la disfruta di e careda. Coach Brainer kier a gradici tur hende cu a yuda di un manera of otro pa hasi esaki posibel. Manera Coach Brainer a bisa tras di cortina ta henter un team ta traha pa logra cu ntur cos ta bay bon.
Notabel ta cu Casiene tabata hopi emociona na final ya cu e la logra un meta unico di landa 750 meter, core bais 20 kilometer y despues core na pia 5 kilometer. Hopi a emociona ora henter e grupo di para-atletanan a dicidi di crusa e meta final sosteniendo Casiene den gran forma pa su logra unico.
Nos di 297sports kier a felicita para-atleta Casiene Tromp, coach Brainer, tur nos otro para-atletanan pa haci e dia aki uno inolvidabel pa hopi cu e presencia esaki. Danki Casiene pa laga nos disfruta di un mainta asina positivo, motivante y inspirativo.
