Diabierna atardi na Departamento di Enseñansa JFK, Ministerio di Enseñansa y Deporte di Aruba hunto cu representante nan di IBISA Aruba, Indebon di Boneiro y FDDK di Corsow a duna informacion relaciona cu e Weganan Interinsular Escolar 2024 cu lo tuma lugar na tur e islanan. E Weganan Interinsular Escolar e aña aki lo ta mas grandi cu nunca ya cu a agrega 3 deporte mas aserca cu lo ta 9 deporte entotal. Mester bisa cu un total di 360 alumnonan di scolnan basico y avansa di tur islanan lo forma parti di e Weganan Interinsular Escolar.
Pero e mas importante ta cu e weganan aki ta fortifica e hermandad entre e tres islanan. Aña pasa a reanuda e weganan interinsular escolar riba iniciativa di Indebon di Boneiro mirando cu e ultimo biaha cu esaki a keda organisa tabata na 2016. Mester corda cu e weganan interinsular lo tuma lugar na tur tres isla cu den e aña 2024, unda Aruba como e prome cu lo host e weganan, sigui pa Boneiro y Corsow lo clausura e esaki den luna di april. Na tur tres isla lo e deportenan clasificatorio cu ta tumando lugar den nos scolnan basico y avansa. E lo cuminsa den luna di februari, maart y april 2024. Ta bon pa menciona cu e scolnan durante henter aña a bataya ariba diferente ramo di deporte y na final ta gana e derecho pa representa nan scol y claro nan isla den e ramo di deporte clasifica.
Minister Endy Croes hunto representante nan di Indebon, FDDK y IBISA Aruba a devela e logo nobo di e Weganan Interinsular cu a keda diseña pa personal di Ministerio di Deporte. A duna un splicacion di e logo cu porcierto a keda masha bunita mes.
