Miembro di e Comision Tecnico “Direccion di Deporte” di COA rumbo pa asisti forum na “International Olympic Academy”

Miembro di Direccion di Deporte den e parti Metodogico y tambe Hefe di Mision pa wegana Panamericano Santiago2023 Jonathan Wever lo biaha pa asina asisti na un Curso na Olympia, Grecia na e Academia Internationacional Olimpico. E forum aki ta un momento unico unda delegadonan di tur pais rond mundo ta bin hunto pa asina forma parti di e “16th International Session for NOAs and NOCs delegates”. Durante e sesion aki lo tin varios topico olimpico cu lo wordo trata y discuti cu enfoke riba programanan y proyectonan educativo den area di “Olympic Values” y esaki tambe lo sirbi como un tremendo oportunidad pa crea conexion cu diferente NOC/NOA pa asina intercambia ideanan y crea relaccionan cu diferente pais pa asina traha hunto. 

 

E topico principal di e aña aki ta “Innovating physical education and Olympic Values education to build a better world” cu extra atencion riba e tema di “Innovative, tailored and inclusive physical education and Olympic values education for the needs of modern societies”. E forum aki lo dura un siman, unda sigur lo tin hopi oportunidad pa por siña y bolbe Aruba cu inspiracion pa traha riba proyectonan local.  

 

Di parti di Comite Olimpico Arubano, nos ta desea Jonathan hopi exito na e forum aki.
Info: Comite Olimpico Aruba