Luis ‘Duty’ Kock ta core un PR nobo durante e Tropical 5km na Miami, su tempo 17.19 minuut

Un logro grandi pa Duty Kock cu a conta nos cu den 2024 e la bin dicidi pa core tur careda mas mihor cu ta posibel mientras den e mayoria e lo purba na mehora su temponan. Dos aña pasa dificil por a kere cu Duty lo ta e persona cu e ta awe. Hopi biaha nos ta neglisha nos mes pa loke ta nos propio salud te ora algo pasa, esaki cu tur consecuencia cu e por trece cune. 

 

Nos di 297sports a haya e storia asina inspirativo y motivante cu nos a combersa cu Duty riba con e la inicia na e deporte aki. 

 

297sports: Kiko a motivabo cuminsa cana/core?

 

Duty: Mi salud a bai hopi atras door mi peso. Mi a cuminsa sinti dolor nan straño na curason y mi brasa nan. Mi por bisa danki na e atleta Al Kock cu a motivami y hinkami den e deporte di coremento.

 

297sports: E sentimiento di bo prome biaha cubo a logra core un distancia largo.

 

Duty: E sentimiento mas grandi tabata ora cumi a core mi prome careda cu tabata Boulevard Loop na aña 2022. Ma core e 10km den un tempo di 51.06 minuut. Mi a core y lagrima nan tabata sali for di mi wowonan. Nunca mi a pensa mi lo ta den e deporte aki. E alivio, satisfacion, orguyoso y mi propio paz tabata unico.  Mi tabata un hende activo. Mi a hunga futbol ora mi tabata jong pero na 2016, mi a sufri un malesa den mi wowo banda drechi y aki mi mester a bay te Merca pa haci un transplante. Mi a keda 1 aña benta riba mi cama sin por ta activo. Eynan mi  surpasa 100 kilo di peso y nunca mi a kere cumi lo por praktica deporte bek. Pero ma keda lucha, kere den mi mes y cu sosten di esnan serca dimi mi a logra.

 

Duty: Mi ta conseho na tur hende cu ta sobrepeso; NUNCA TA LAAT. Si abo kier logra algo no pensa dos biaha, bay pe. Corda cu perde bo peso ta abo ta dicidi, den bo man e ta. E ta un proceso, cu hopi obstaculo y lama bruto pero pabo logra esaki bo mester ta honesto cubo mes. Ami Duty a bay bow di un dieet cumi pareha a haci pami cu ta Keto Dieet y e la funciona. Tin varios manera pero corda ‘stick to it’. Semper ta motiva y sobretodo disciplina. E satisfacion ta bini dimes anto na gran escala. 

 

No maltrata bo curpa y semper ta conciente dibo actonan. Ban cuida nos mes y nos salud.