Cu Mikel Schreuders ta un di e mihor landadonan di Centro America, Caribe y kizas hasta Sur America esey ta un hecho pa basta tempo caba. Si nos wak e resultadonan obteni pa Mikel e ultimo 1 anja y mei den e diferente campeonato grandi rond mundo nos por ripara su su prestacion ta na nivel mundial. Anja pasa den e weganan Suramericano na Paraguay, Mikel a laga su nomber graba unda e ta logra 1 medaya di Oro(e prome den historia pa Aruba) y dos medaya di Plata. Den e siman cu a pasa, un bes mas Mikel Schreuders ta presta den forma sublime y ta logra triunfa cu 4 medaya den e Weganan Centro Americano y del Caribe na El Salvador. Mikel ta logra medaya di Oro den 50m pecho cu un record di e Weganan CAC, pues e tempo mas lihe den historia di e weganan. Pa loke ta Mikel su 3 medayanan di Plata, e ta logra esakinan den e 50m freestyle, 100m freestyle y 50m mariposa. Cuater anja pasa na e weganan CAC na Barranquilla, Colombia, Mikel ta logra gana dos medaya pa Aruba esta 1 Plata y 1 Brons. Pa hopi anja landado Mikel Schreuders ta bou guia di coach nacional, Ismael Santiesteban ora e landa pa Aruba. Mikel mes ta residencia algun anja caba na Marseille, Francia unda e ta landa pa un club profesional.
All by all por bisa cu Mikel sin duda ta super satisfecho cu su prestacion durante e weganan aki y awor ta preparando su mes pa e Campeonato mundial di landamento cu lo tuma lugar aki dos siman na Fukuoka, Japon e dianan 14 pa 30 di juli.
Pabien y hopi exito Mikel
Photo: COA
