Diamars mainta, Comite Olimpico Arubano tabata tin e grato honor di ricibi Gobernador di Aruba, S.E. Alfonso Boekhoudt, pa un bishita di trabou. Presidente di Comite Olimpico Arubano, sra. Wanda Broeksema, conhuntamente cu Secretaria General di COA, sra. Nicole Hoevertsz den presencia di e miembronan di e directiva di COA y e miembronan di staff di COA a ricibi Su Excelencia, Alfonso Boekhoudt. 
Gobernador Boekhoudt a haya un guia door di e edificio, combina cu un splicacion breve di henter e proceso di trabou na e oficina cu a culmina na Maart ultimo durante e bishita di president di IOC, sr. Thomas Bach.
Prome a splica Gobernador e meta tras di henter e parti pafor di e edificio di COA, incluyendo e bunita obra mural unda a resalta cu tur hende, sin mira destincion di genero, rasa, color of religion por practica deporte. Paden Su Excelencia a haya un splicacion di cada espacio den e oficina, cada parti cu un storia impresionante su tras. Tambe Gobernador Boekhoudt a sinta cu e representantenan di directiva, e direccion di deporte, e direccion di desaroyo y e presidente di e comision di atleta, unda a elabora riba e trabou cu COA ta ehecuta na bienestar di nos atletanan y deporte local.
Por ultimo Comite Olimpico Arubano a haci entrega na Gobernador Boekhoudt di un bunita obsekio den forma di un pin cu ta identifica e participacion di Aruba na tur e Weganan.
Pa COA tabata un honor grandi di por a ricibi Gobernador Alfonso Boekhoudt na e oficina recien inaugura. Ta spera di por sigui informa Gobernador di e proyectonan y resultadonan cu ta logra.