Despues cu pa prome biaha den historia a tuma lugar un Anti-Doping Educator
Instructors Training, awo region Caribe conoce diesun instructor di Anti-Doping.
E training aki a tuma lugar na Aruba y tabata un colaboracion entre Caribbean Regional Anti-Doping Organization (RADO), Comite Olimpico Arubano y Comision Anti-Doping di Aruba.
E training a wordo duna pa facilitadornan di United Kingdom Anti-Doping (UKAD) y United States
Anti-Doping Agency (USADA), despues cu Caribbean RADO a delibera y negocia pa algun aña cu ambos organisacion anti-doping. Wendy Henderson, UKAD National Trainer, a indica cu e partnership cu Caribbean RADO ta uno super valioso.
“E train-the-trainer workshop aki a crea un oportunidad hopi importante pa trece hunto
Educadornan di ‘Clean Sport’ for di region Caribe. Y cu support di UKAD a logra desaroya tecnicanan di instrui como tambe abilidad pa train y mentor pa asina prepara mas educador anti-doping den region Caribe. E conocemento, expertisio y disponibilidad pa siña a produci hopi maneranan placentero y creativo pa educa atleta riba tema di anti-doping. UKAD y e participantenan a haya un cantidad grandi di conocemento, abilidad y educacion for di otro.
Tammy Hanson, USADA Director of Elite Education, cu a duna e modulonan den area di ‘Athlete
Outreach’ (educacion na eventonan) tabata tin palabranan di aprecio pa e participantenan.
‘Mi ta sumamente impresiona cu e “hamber” di cada participante pa siña y amplia nan programa di educacion. E grupo aki tabata un grupo hopi special y e tabata un honor y placer pa dedica tempo cu nan durante e ultimo dianan. Nan preguntanan riba e tema di ‘Outreach’ tabata hopi aprecia y alcaso y a mustra nan disponibilidad pa siña y pa duna educacion como tambe train e siguiente generacion di educadornan.
Educadornan Anti-Doping cu experencia di paisnan miembro di Caribbean RADO a wordo selecta pa participa na e training aki cu tabata di nivel avansa.
Presidente di Caribbean RADO sr. Patrick Werleman ta anxioso pa mira e contribucion di e
instructornan nobo.
“Pa prome biaha den nos historia nos a trece personanan experencia riba tereno di anti-doping
hunto cu facilitadornan di UKAD y USADA pa haya training pa bira anti-doping instructor. Esaki ta un paso nesecario pa garantisa cu tur nos paisnan miembro implementa un Plan di Educacion anti-doping. E instructornan nobo lo regresa nan pais y cuminsa traha cu e National Anti-Doping
Organizations (NADO), e Comite Olimpico (NOC) y e Representante di RADO di e pais. Y si ta nesecario defini nan target group pa sigui desaroya nan progroma di educacion anti-doping y pa despues pone ‘man na obra’. Caribbean RADO Executive Director Dr. Sasha Sutherland a indica cu e colaboracion entre UKAD y USADA lo tin benificionan cu lo tin un alcanse hopi leu.
“Nos ta anticipa cu nos region ta den mihor posicion awo cu nos tin instructonan cu tin amplio
conocemento y abilidad. Nan por regresa nan respectivo pais y train y educa personan cu lo por
yuda duna educacion di ‘Clean Sport’. Nos ta spera tambe cu despues cu nos haci un evaluacion final cu UKAD y USADA nos por continua cu nos plannan riba programanan di educacion anti-doping, pa asina continua cu training pa Education Officers, Doping Control Officers y otro personanan cu ta duna apoyo den Clean Sport pasobra e atleta ta depende di esaki.”
E training a cuminsa riba 6 di januari 2024 cu un training virtual y a continua den forma di presencia fisico na Aruba durante dianan 12, 13 y 14 di januari 2024.
