996
Na 2022, e clasico di Hooiberg Vets a bay preta unda Barcelona ta gana Real Madrid cu e score di 2 – 1. E anja aki, e simpatisadornan di Real ya for di trempan a divulga nan lista di hungadornan warando riba esun di Barcelona cu nunca a yega te e diasabra di wega ora nan a presenta cu dos team na tereno di Rooi Afo, e cas di El Clasico di Hooiberg Vets. Barcelona a bini hasta cu nan mascota cu a traha riba e nervio di e hungadornan di Real Madrid.
Pa loke ta e wega nos tin cu bisa cu bisa cu Real a start fuerte y mesora a busca pa habri e marcador pa medio di nan delantero Jair Tromp cu ta anota cu un tiro lastra pa e 1 – 0. Pero e alegria no a dura mucho ora cu Irvin Gil di Barcelona ta empata e wega 1 – 1 cu un bunita tiro di leu. real ta bolbe bay ariba 2 – 1 ora cu Jefta Charles ta anota un penalti pita pa referee Rambo Flanegin despuues di un handsball den e area penal. Net prome cu half, Barcelona ta bolbe empata 2 – 2 ora cu Elvis Perez ta los un tiro diagonal fuera di alcanse di e keeper Alvin Vrolijk. Mester bisa cu te na half e wega tabata uno hopi pareu.
Den e di dos tempo, e wega a bira uno al estilo trafico di un solo direccion ya cu Barcelona a cambia strategia y e bini cu e tiki taka y aki ta caminda cu e golnan a cuminsa cay uno tras di otro. Tanto Seever Krozendijk, Eugene de Cuba, Egbert Kock y Kyri de Weever ta anota 4 gol pa Barcelona unda e wega ta caba 6 – 2. Despues di e wega, Real Madird ta fire coach Fenny Tromp. Awor ta te otro anja atrobe Real Madrid di e chens pa revancha.
Un danki na tur hungador y Fanaticada di Hooiberg Vets cu a hasi e di 8 edicion di El Clasico HBV un exito. Nos a analisa y discuti e wega te den orana di marduga den un dushi ambiente. Un danki na Meneer Eddie de Veer cu via nos hungador Dietwin Krozendijk a sponser un paar di caha di Chill y Balashi. Tambe na Caymannan Di Rooi Afo pa e Veld y Afdak. Danki na famia Orlando de Weever pa e potretnan. Bon trabou di e Directiva di Hooiberg Vets cu a hinka tur cos den otro, Hooiberg Vets, mas cu futbol.
