621
E delegacion di Team ARU den e deporte di vela ta cla pa nan competencia den e Weganan Panamericano Santiago 2023. Na e ciudad di Algarrobo cual ta un subsede di e weganan, e deporte di vela lo tuma lugar. Nos delegacion di Aruba tin un total di 3 regatista cu lo competi den e Panam Games 2023.
Nos tin e dos bez atleta Olimpico y medayista di Oro CAC, Philipine van Aanholt cu lo competi den e categoria di Sunfish. Su ruman homber, Just van Aanholt lo competi den e categoria Ilca 7. Por ultimo nos tin Ethan Westera cu lo haci su debut den e categoria IQ Foil 95.
Hefe di Mision, Jonathan Wever a bishita e delegacion na Algarrobo unda a entrega Philipine su set di uniform di Team ARU. Tur nos regatistanan nan ta den pleno preparacion pa e gran dia di competencia cu lo inicia diasabra awor 28 di okotober.
Exito for di awor caba na Philipine, Just y Ethan.
