E delegacion di cabay y jinete y amazona a hasi un tremendo presentacion na Curaçao durante e fin di siman cu a pasa. Ariba diasabra tur tres cabay di Aruba a logra premionan den nan competencia. Oasis de los Sauces di Criadero Hermanos Bruin a logra un prome lugar den su categoria y a keda tambe e Gran Campeon den e modalidad di Trocha.
Den loke ta e modalidad di Paso Fino, akinan Suavidad de la Siberia di Criadero W a keda cu un prome lugar den su categoria y a keda Gran Campeona Reserva den e Campeonato. Secreto de Magico di Famia de Cuba tambe a logra un prome lugar den su categoria y despues den e Campeonato a keda como e Prome Finalista.
Diadomingo a toca turno na e delegacion di 6 jinete & amazona pa drenta pista. Por bisa cu tur tambe a logra premio y Aruba a haya 3 medaya di plata. Den e categoria di Amazonas Infantil, Zaria de Groot a keda cu un medalla di plata y Emilie Lomans cu un cuarto puesto. Den Jinetes Junior Zachary Coffie tambe a logra un medalla di plata den su categoria.
Den Amazonas Juvenil Xielle Koolman a logra un tercer puesto y Carolina de Cuba un cuarto puesto den su Categoria di Amazona Aficionada. Por ultimo Aruba a sera e anochi cu un medalla di plata mas di Jenilee de Cuba den e categoria di Amazonas Mayor. Pa e delegacion aki, Zaria, Zachary, Xielle y Carolina tur a competi pa prome biaha na Curaçao. Un palabra di pabien na tur pa e bunita representacion na nos hermana isla.
