Aruba 10U ta gana Mexico 4-3 riba prome dia di campeonato di Little League Caribbean & Latin American Series di edad 10-under. Aruba tabata atras 0-3 den di cuater (4) inning, pero a traves di esfuerso di e muchanan a logra bataya y empuha 4 careda pa tuma liderazgo di e wega 4-3. Despues di a logra empata e wega 3-3, y cu 1 out solamente, Jaydrick Figaroa a bati un bala den infield pero a logra vence e double-play, empuhando e careda decisivo pa Aruba.
Evan Kelly a sali pitcher ganador e wega pa Aruba. Ela permiti solamente un hit y cero careda den tres y un tercer inning, ponchando tres y a duna solamente un base por bola. Zair Tromp a habri e wega pa Aruba. E pitcher inicial a permiti solamente tres hit y tres careda (cero mereci) den dos y dos tercer inning, ponchando cuater y cu tres base por bola.
Anuar Franken y Prince Ramada tur dos a dal un hit pa Aruba, bayendo 1-pa-2. Eugöne Helder, Jaxon Erasmus, Jayden Croes, y Jaydrick Figaroa tur un a empuha careda (RBI) pa Aruba. E team di Aruba a demostra disciplina na plato, bringando nan turno cual a conduci na 9 base por bola en total.
Dialuna Aruba ta enfrenta ekipo di Republica Dominicana pa su segundo partido. Exito y pabien muchanan!