Durante di un ceremonia protoculario riba Dia di Rey,a tuma lugar e entrega di premio Copa Felipe B Tromp 2024. For di man di Su Excelencia Gobernador di pais Aruba, Sr. Alfonso Boekhoudt e diferente ganadonan a haya nan trofeo y premio di estimulo. Esaki ta hobennan of grupo di hoben cu ta ricibi e premio pa nan dedicacion ariba tereno social, cultural of deportivo. E aña aki pa e area di deporte a toka honor na futbolista Ethan Geerman, landado Braynsly Dirksz y bike cross Kailen Wouters pa ricibi e premio. Tambe riba tereno social nos por a mira cu e hoben Dalton Conijn di Luna Foundation a haya e honor.
Tanto Ethan Geerman (Pre-hubenil) y Braynsly Dirksz (Hubenil) a gana e premio Copa Felipe B Tromp mientras cu Kailen Wouters(pre-hubenil) y Dalton Conijn(hubenil) a gana e premio Estimulo. Den e area di deporte e hobennan Ethan Geerman, Braynsly Dirksz y Kailen Wouters no ta desconoci den nos comunidad. Ethan un hoben cu ta sufri di un malesa di cuero, pero cu hamas a pone di no praktika su deporte preferi esta futbol. Ethan ta conciente di e peliger pero cu ayudo di su sernan keri y tur esnan rond di dje e lo tin un bon cuido pa asina e por sigui padilanti den bida.
Pa loke ta Braynsly y Kailen, ambos ta hobennan cu actualmente ta domina den nan deporte logrando cosnan grandi pa nan mes, nan deporte y Aruba tanto na cas como den exterior. Ta hobennan cu potencial grandisimo cu un futuro prometedor. Un tiki di e hoben Dalton Conijn di Luna Foundation cu pa hopi anja ta cuida cachonan di caya bandona cu ta yega na Luna Foundation y asina ta cuidanan y busca un mihor hogar pa nan. Tur e hobennan aki nan logronan ta esfuerso di e propio hobennan guia pa nan lidernan y nan mayornan.
Un palabra di pabien na Braynsly Dirksz, Ethan Geerman, Kailen Wouters y Dalton Conijn cu nan premio bon mereci.
