1.1K
COA tin un partner nobo den Royal Aruba Aloe, un partner cu ta kere den nos proyecto y aspiracionnan. Diabierna anochi na e ceremonia di despedida, Comite Olimpico Arubano, COA a anuncia dilanti tur presente cu nan tin un partner nobo den e compania Arubano, Royal Aruba Aloe. Secretaria General di COA, sr. Nicole Hoevertsz a expresa su gratitud riba e acuerdo nobo aki. E la splica “COA y Royal Aruba Aloe tabata tin basta tempo caba den combersacion cu otro, pero nos mester a wak prome kico tur nos tin en comun prome cu nos a yega asina leu. E balornan di tanto COA como Royal Aruba Aloe ta riba mesun linea.
Royal Aruba Aloe no solamente lo sostene e atletanan di Comite Olimpico cu e parti financiero, pero tambe cu producto. Nicole mes ta hiba e productonan di Royal Aruba Aloe ora e biaha pa exterior pa duna como regalo y e hendenan ta masha agradecido mirando e calidad unico di e productonan. Na e Weganan Panamericano lo otorga esaki como regalo na entre otro, e presidente di e Villa Panamericano, e presidente di Panam Sports, e presidente di IOC como tambe e invitadonan special algun di e productonan di Royal Aruba Aloe. Sperando asina cu otro compania por tuma e ehempel aki di un promocion unico den exterior pa nos atletanan y Aruba.
Koos Veel di Royal Aruba Aloe ta masha contento cu e acuerdo firma cu COA pa awe nan por duna algo bek na comunidad. Royal Aruba Aloe ta un compania netamente Arubano cu ta emplea alrededor di 150 hende, nan productonan ta ser exporta pa 55 pais rond mundo y na 15.000 tienda na Merca por haya e productonan di Royal Aruba Aloe. Koos ta masha agradeci na e comunidad di Aruba pa nan sosten pa duna e aloe di Aruba e fama mundial. Y manera Koos a bisa den su ultimo frase; “E partnership entre COA y Royal Aruba Aloe lo ta uno pa hopi aña”.
