Diabierna dilanti nan oficina nobo, Comite Olimpico Arubano,(COA) a tene un anochi ameno y masha special, unda a celebra e ceremonia di despedida di e delegacion Arubano, cu proximamente lo sali pa e Weganan Panamericano Santiago 2023. Presente na e ocasion special aki, nos por a mira algun di nos atletanan y nan coachnan, miembronan di directiva di COA, Minister di Enseñansa y Deporte, Endy Croes, direccion tecnico di COA, mayornan, federacionnan deportivo, invitadonan special, patrocinadornan. Secretaria general di COA y alabes vice-presidente di IOC, sra. Nicole Hoevertsz como tambe Minister Croes a hiba palabra na e anochi aki. Loke mas a resalta den e discursonan tabata e colaboracion y cooperacion cu nos mester brinda na otro pa cada bez nos dal un stap padilanti. Na e atletanan carga y defende e bandera di bo isla cu tur honor, un sentimento di patriotismo mester reina or abo bisti e uniform di Aruba na tur momento. Corda cu bo ta e embahador maximo di bo isla den exterior. A desea henter e delegacion tur clase di exito durante e dos simannan na Santiago, Chile.
E anochi a sigui cu diferente presentacion y intercambio. E companía Totto un bes mas a confecciona e uniform deportivo di e delegacion di Aruba pa e Weganan Panamericano 2023. Mas cu claro nos atletanan a modela e bunita outfit cu Team ARU lo luci cune durante e dos simannan cu nan lo permanence na Chile. Presidente di COA, sra. Wanda Broeksema a otorga na Minister Croes, e pin oficial di Aruba pa e weganan di Santiago 2023. Tambe a otorga na Minister Croes e uniform oficial di Team ARU. Un momento di sorpresa pa tur presente tabata e desvelo di e billboard nobo di COA, e biaha aki cu algun imagen di nos atletanan cu lo competi na e Weganan Panamericano Santiago 2023. Comentarionan tabata ta ‘E billboard a keda hopi bunita’. Por ultimo, COA cu gran orguyo a anuncia e compania Royal Aloe Blue como nan partner nobo.
Den su calidad como Hefe di Mision, sr. Jonathan Wever a duna un presentacion detaya di tur loke por spera e delegacion di Aruba na Chile. Tambe su persona a introduci nos atletanan cu lo representa nos dushi isla den e weganan na Santiago 2023.
E Weganan Panamericano Santiago 2023 lo ta di 20 di oktober te cu 5 di November. Nos delegacion di Aruba ta consisti di 14 atleta den 10 evento. Aruba lo competi den e deportenan di karate, ciclismo BMX, landamento, landamento artistico, openwater, boliche, IQ foil, vela y tiro
Na e Weganan Panamericano na Santiago de Chile, lo participa alrededor di 7000 atleta di 41 pais kendenan lo bataya den 39 disciplina di deporte.
COA ta desea cada un di e integrantenan di e delegacion pa e Weganan Panamericano Santiago 2023 tur clase di exito y lo sigui nan pasonan di cerca, manteniendo pueblo di Aruba na haltura na tur momento.
