1.2K
Simplemente IMPRESIONANTE. Esaki ta loke e organisadornan di e IRONMAN America a bisa Brainer y Disjonrick despues cu nan a finalisa e 140.6 miya(226.3 km) di e Ironman na Maryland, Merca. Tiki nan por a kere cu Brainer y Disjonrick lo bari e record estableci pa Johnny Agar cu tabata 16 ora, 55 minuut y 35 seconde. Debi na esaki tambe e atencion di media y e publico tabata grandi pa e delegacion di Aruba. Cada biaha a saca potret pa keda cu un recuerdo di ambos atleta.
Brainer y Disjonrick a bini dicidi y asina mes cu Brainer a bisa nos cu e biento a hunga un rol grandi riba su persona den e parti di coremento na pia. Hunto cune temperatura frieu e la lucha duro den coremento cu no tabata nada facil riba un ruta cu nan no conoce. Asina mes cu apoyo di henter team di Aruba presente e la pone su mes pa finalisa e IRONMAN den un tempo aceptabel. Pero algo cu Brainer no por a kere ta cu hunto cu Disjonrick, nan tempo registra di 14ora, 40 minuut y 58 seconde a bira mesora e fastest track record di e IRONMAN na Maryland. Pa cu esaki Brainer, Disjonrick y Beyond Sports Limit Foundation Aruba/Team Disjonrick a ricibi e Award Physically Challenged/ Intellectual Disability Open Division, e prome den Special Teams. Es mas, Disjonrick cu su 19 aña a bira e participante mas hoben den historia di e IRONMAN cu a competi den su categoria. Cu otro palabra un logro historico cu lo keda registra den e buki di Ironman na Maryland.
Brainer a conta nos cu claro awor nan lo kier yega mas leu. Kizas e WORLD CHAMPIONSHIP IRONMAN lo ta un posibilidad pero pa cu esaki nan lo mester atende 1 evento di Ironman America mas prome cu fin di Januari 2024. E posibilidad ta existi pero nan lo mester sinta y evalua cu henter e team di Disjonrick y Beyond Sports Limit Foundation. Sin duda esaki lo ta e soño mas grandi di cualkier tri-atleta cu ta participando na e campeonatonan di Ironman. E tempo registra na Maryland lo ta un ventaha pa Brainer y Disjonrick.
Por ultimo nos kier bisa esaki. Ta hopi esfuerso y sacrificio tin tras di un participacion den e estilo cu Brainer y Disjonrick ta haci esaki. Un preparacion inmenso di henter un team. Mester percura pa tur cos ta na su lugar cu paramedico nan, hende pa yuda riba ruta, cuido di Disjonrick y asina nos por keda menciona. Presente na Maryland tabata Disjonrick su Tanta Kathy, Su Padrino Gerry, Brainer su casa Dianne, Gerald Moreta y Junior Rivero. Nan a gradici e organisacion completo di Ironman Maryland, pero particularmente Todd Fitzgerald y Scott Langen di Ironman North America y full e Team di Volunteer and Staff di Ironman Maryland, sin lubida nan partnernan & Official Partnersnan Local.
Un palabra di pabien na tur pero tur hende cu e kere den e bunita proyecto aki. Nada mas bunita di representa e bandera di Aruba den exterior y sigur ora bo tende Aruba su nomber na numeroso ocasion wordo menciona y elogia pa loke a wordo haci.
Conociendo Brainer, Disjonrick y Gerald nan ta cla pa kiko cu ta. Den pasado ya caba a haci Duo den Ronde van Aruba, 70.3 Ironman na Aruba, Triathlon y tur sorto di careda na pia di 5km te 42km.
