Cu 800 atleta di 55 pais rond mundo e 2023 XTERRA World Championship den e deporte di off-road triathlon a start awe diasabra na e ciudad di Molveno, Italia. Entre e 800 competidornan nos tin Herbert Merryweather y Gert van Vliet cu a competi den e Men Age Group. Mester bisa cu Herbert y Gert a haci e distancia completo cual tabata ta 1.5km landa, 32km riba bicicleta y 10km na pia.
Mester bisa cu aunke e evento tabata uno pisa cu hopi subida y bahada cu un elevacion tog dificil Herbert a caba e careda bon. E ta caba e XTERRA den un tempo final di 4 ora y 24 minuut cual sin duda e ta contento cu su prestacion.
Lesion Gert van Vliet
Pa loke ta e careda pa e legendario Gert van Vliet esaki no a bay manera ser spera. Gert dado momento ta sufri un lesion na su pia ora e la sali for di awa. Gert mes a comenta cu nos; “Mi a haya un lesion na mi pia ora di sali di awa. Mi a purba di sigui ariba bicicleta pero despues no por a sigui mas.
Mi a echt gusta e challenging course . E ta super tough. Mi lo purba bek otro aña pa clasifica atrobe”, Gert a bisa. Conociendo e legendario Gert,
homber di mil bataya, e lo bay pe sigur. Pronto recuperacion pa Gert.
Ta bon pa bisa aserca cu tanto Herbert como Gert a participa na e careda di XTERRA na Austin Texas na April 2023, na unda nan a coi podium den nan respectivo categoria y a logra cualifica pa e XTERRA World Championships cu a tuma lugar na Trentino, Molveno na Italia.
Den e mundo di off-road triathlon esaki ta e competencia mas grandi na unda tur e mihonan di mundo ta busca cualificacion.
Un pabien y exito na Herbert y Gert.
