710
Entrante aña 2024 e empresa di servicio profesional BDO Aruba y Comite Olimpico Arubano ta bira socio. Diaranson representantenan di ambos organisacion a formalisa e acuerdo cu firma di Partner di BDO Jamil Tromp, den presencia di Zarina Trimon, y di parti di COA Presidente Wanda Broeksema y Secretaria General Nicole Hoevertsz.
E acuerdo ta ensera cu BDO lo ta encarga cu e revision (“review”) di e relato financiero anual di COA, pa asina esaki wordo presenta pa aprobacion na e organo maximo di e asociacion, cu ta e Asamblea General di Federacionnan Miembro. Esaki ta tuma lugar generalmente den e periodo juni/juli di cada aña.
Pa COA e acuerdo di cooperacion aki ta garantisa un nivel di control di e administracion financiero cu ta cumpli cu e standaardnan internacional na cua COA ta wordo someti. Cu BDO como socio COA a tuma un paso importante den un proceso mas amplio di revision di e administracion y maneho financiero, pa
asina sigura cu e administracion, proceduranan interno, trahamento di relato, y raportahe na e stakeholdernan tuma lugar na un forma corecto.
Partner di BDO, Jamil Tromp, cu hunto cu Zarina Trimon lo ta encarga cu e tareanan cu ta regarda Comite Olimpico Arubano, a expresa su satisfaccion pa cu e acuerdo nobo aki: “BDO ta sumamente contento cu e cooperacion aki, cu nos ta considera importante pa deporte y pa comunidad di Aruba en general.
Riba e potretnan por aprecia e momento di firmamento di e acuerdo di cooperacion entre BDO y Comite Olimpico Arubano.
