Atletanan Kyra Hoevertsz y Mikayla Morales a termina nan competencia den e World Cups na Canada y Francia
Pa varios siman nan largo e duo elite den e deporte di landamento artistico a permanece den exterior unda nan a competi den e World Cup Series di Artistic Swimming. Kyra y Mikayla a representa Aruba na prome Canada y mas recien Francia.
Na Francia un total di 23 pais a participa. E duo a logra sali di 18 lugar, y e solo landa door di Kyra na di 5 lugar.
Atletanan Kyra y Mikayla a splika cu e sistema nobo ainda tin cosnan cu mester wordo clarifica, y cu tur pais presente a haya varios penalti door di esaki. E duo di Aruba tambe a haya un par di penalti, pero ainda nada cu no por wordo aregla pa e proximo competencianan. E sistema nobo tur pais mester custuma cune y esaki lo hiba su debido tempo. Awor Kyra y Mikayla lo sigui entrena y prepara pa e Weganan CAC na El Salvador den luna di juni/juli.
