Cu hopi orguyo y entusiasmo, Team Oranjestad Aruba ta anuncia cu e siman aki nos peloteronan lo biaha pa Marion, Illinois, USA, pa representa Aruba na Pony Pinto U8 World Series Tournament 2026.
E seleccion U8 aki ta consisti di talentonan hoben for di cuatro organisacion di baseball na Aruba:
•Sabana Grandi Jets
•Red Machine
•White Sharks
•Grasshoppers
E seleccion aki ta wordo maneha pa Manager Sean Toppenberg, huntu cu su coachnan Arsan Wester, Alvin Boekhoudt y Daniël Fernandes Perna, cu a traha incansablemente pa prepara e muchanan pa e reto internacional aki.
E biahe aki ta mucho mas cu un torneo di baseball. Ta un oportunidad unico pa e pelotero nan desaroya disciplina, respet, liderazgo y crea amistad cu hobennan di diferente pais, mientras nan ta bisti e colornan di Aruba cu orguyo.
Durante e torneo, Team Oranjestad Aruba lo competi contra representantenan di diferente pais y region.
Nos ta invita Aruba pa sigui y apoya Team Oranjestad durante e torneo aki.
Finalmente, na nomber di tur pelotero, coachnan, manager y famia, nos kier expresa un palabra di sincero gradecimento na tur nos sponsornan cu a brinda nan apoyo. Sin boso confiansa, generosidad y compromiso, e soño aki no lo tabata posibel.
Boso ta un parti esencial di e famia di Team Oranjestad Aruba, y nos ta profundamente gradeci pa tur loke boso a haci pa yuda haci e proyecto aki bira realidad.
Masha danki pa kere den nos muchanan y den futuro di baseball na Aruba.