Skirbi pa historiador deportivo Fico Vrolijk
Diabierna dia 11 di october y tambe dialuna 15 di october Aruba tin cu hunga dos wega importante den Centro Deportivo Guillermo Trinidad contra Haiti pa e Nation’s League B – Grupo C. Haiti ta ser considera un di e mihonan den Liga B y cu tin hopi chens di promove pa Liga A. Prome biaha cu nos seleccion local a hunga contra esun di Haiti tawata dia 8 di april 1944 na Corsou den un torneo di 4 pais organisa pa Nederlandse Antillen Voetbal Bond (N.A.V.B.). Hunto cu Aruba y Haiti a participa tambe e seleccionnan di Venezuela y di Corsou. Den e wega contra Haiti e cañonero Arubano Chas Loefstok, un par di minuut prome cu halftime a los un di su famoso tironan cu a dal na e palo y drenta gol pa duna Aruba bentaha di 1-0. E bentaha aki a dura te un minuut prome cu wega caba y tawata e hungado Rouzier cu for di un tiro di skina a score e gol di empate pa Haiti.
Na luna di augustus 1957 a tuma luga na Corsou e campeonato Centro Americano y di Caribe di Futbol y Haiti a resulta campeon invicto di e torneo aki ganando tur su weganan. Cuatro di e hungadonan di Haiti esta Elie, Tassy, Yaboute y Fenol cu tawata e maximo goleador di e torneo cu 8, a wordo selecciona den e team “tur estreya” pa e cronistanan deportivo na Corsou.
Prome cu nan a regresa Haiti nan a dicidi di bin Aruba pa hunga dos wega. Dianan 26 y 27 di augustus e dos weganan aki a tuma luga den Wilhelmina Stadion y nan a resulta historico pa futbol di nos isla. E prome wega a tuma luga dialuna anochi dia 26 di augustus y Aruba a derota Haiti cu score di 3-1. Apenas tawata tin un minuut hunga cu Evenio Gonzalez a anota e prome gol pa Aruba. Na di 13 minuut Evenio a bolbe anota pa duna Aruba bentaha di 2-0. Na di 13 minuut di e di dos tempo e marinier Ton Verstrate a drenta wega pa Dudu Adonis. Na di 21 minuut Wilson a anota e unico gol di Haiti y e score a bira 2-1 pa Aruba. Den e ultimo secondenan di e wega Ton Verstrate a anota e di tres gol cu a seya e victoria di 3-1 pa Aruba. Despues di e ultimo pitaso di referee Dunchi Tromp a reina un alegria inmenso cerca tanto e hungadonan como e miles di fanaticonan cu a paga pa mira e wega.
Pa su mañan anochi tawata tin e di dos wega y asina cu Cochi Tromp a pita pa e wega cuminsa Haiti a bay den atake y cu un cabesaso e goleador Fenol a anota e prome gol pa Haiti cu a mantene e bentaha aki di 1-0 te na sosiego. Despues di halftime na di 16 minuut Gochi Brion a cobra un corner den gran forma. E bala ya a drenta gol ora cu Ton Verstrate, oportuno manera semper a kop e bala pero ya esaki a pasa e liña di gol caba. E gol “olimpico” aki di Gochi Brion, cu a empata e wega na uno a trece un alivio y alegria cerca e fanaticonan cu pa e wega aki tawata mas hopi cu esun di prome. Shete minuut despues Ton Verstrate a ricibi un pase di Gochi Brion y mesora a shoot den gol pa manda Aruba dilanti 2-1. Faltando 13 minuut pa e wega caba e semper peligroso Fenol a logra pasa keeper Pupy Diaz pa di dos biaha. Cu Aruba den atake e final a yega cu e score tabla na 2-2.
Aki ta sigui e hungadonan cu a participa den e dos weganan y cu a logra e hazaña historico pa nos isla: Pupy Diaz, Mai Mateo, Edwin Dirksz, Chito Croes, Watty Vos, Jose Boye, Mundo Kemp, Doc Williams, Gochi Brion, Evenio Gonzalez, Nulfo Steba, Dudu Adonis, Ton Verstrate, Yoon Frank, Bibi Perez, Nata Andrews, Pedro Tromp, Fon Paula, Joy La Rosa y Cai Helder.
Di tur e hungadonan aki e unico cu ta cu nos ainda ta Doc Williams. Ban spera cu e ta bon di salud y cu A.V.B. por invite pa bin mira e weganan di diabierna y di dialuna.
F.J. “Fico” Vrolijk