Aruba Sports Management ta anuncia cu Aruba, desde e luna aki, tin 12 Instructor di Landamento nivel A nobo.
Na aña 2022 bou auspicio di federacion di landamento “Aruba Aquatics Federation” a cuminsa cu un curso pa formacion di Instructor di Landamento nivel A. Esnan cu completa e curso aki ta formalmente cualifica pa duna les di landamento na alumnonan cu ta wordo prepara pa diploma landamento A y B di Aruba Aquatics Federation. E curso aki tabatin un duracion di casi un aña y a ensera varios tema (den forma di modulo) cu ta necesario pa e formacion di e instructor. Temanan cu a ser trata den e curso ta entre otro: Tecnica-Metodologia-Didactico, Aspectonan Fisiologico y Anatomico den landamento, Liderasgo (leadership), seguridad y rescate den awa, practica di duna les y stage. Esnan cu completa cada modulo cu exito ta haya derecho pa haci e examen final den cual e cursista mester demonstra suficiente conocimento teoretico y tambe suficiente habilidad pa duna les den ambiente sigur, alegre y productivo.
E curso a inicia cu 19 cursista y finalmente tabata 12 cursista cu a logra completa e curso cu exito y asina pues oficialmente ta bira Instructor di Landamento Nivel A.
Den un ambiente ameno, recientemente a tuma lugar e acto di entrega di e diploma na e cursistanan cual a ser haci pa sra. Sandy Rasmijn-Leito den su calidad di representante di Comicion Landamento Elemental di Aruba Aquatics Federation y sr. Patrick Werleman docente principal di e curso.
E cursistanan cu a completa e curso cu exito ta: Aymara Franken (Best Student), Mishanty De Freitas, Ariana Dijkhuizen, Ronald Fun, Santiago Gomez Ramos, Daan Keetlaer, Giancarla Larez, Arabella Maduro, Cianna Tromp, Lynette Eliza Tromp, Zahira Varis, Amalia Werleman y Seanthrick Toppenberg.
Un palabra di pabien ta bay na tur esnan cu a logra completa e curso. Alabes ta gradici Aruba Aquatics Federation pa organisa e curso y pa duna Fundacion Aruba Sports Management e confiansa pa duna e curso aki.
Aruba Sports Management
![](https://297sportsaruba.com/wp-content/uploads/2023/06/WhatsApp-Image-2023-06-12-at-1.33.32-PM-1024x768.jpeg)