Giants Aquatics Aruba ta rumbo pa e 33rd anual Speedo Winter Championships Plantation. Pa participa na e campeonato aki, e atleta mester cualifica. Esaki ta di tres aña cu Giants Aquatics, funda na aña 2020, ta participa. Na aña 2021 Giants a conta cu 14 atleta cu a cualifica, di cual dos a pasa pa final. Aña pasa 12 atleta a logra cualifica y 5 a pasa pa final. E aña aki, Giants ta biaha cu 31 atleta cu a cualifica, cu ta mas cu dobel di e cantidad di aña 2022! Esaki ta un gran logro cu ta materialisa e vision di Giants Aquatics. E vision di Giants ta encera entre otro: prepara e atleta pa e competi riba nivel internacional, experiencia competencia riba nivel halto, haci su mes presente den bista di e coachnan cu ta scout y bin na remarca pa ricibi scholarship, cu cual e por studia, mientras e ta haci su deporte.
E atletanan a prepara nan mes intensivamente bou guia di head coach Jordy Groters (Fina coach level 3) y Darwyn Marchena (Fina coach level 1) Banda di esaki, nan a conta cu preparacion mental di psicologo di team Giants, Jeff Feliciana. Y mas importante ainda, nan ta conta cu sosten incondicional di nan mayornan, cu a recauda fondo, yuda organisa e biahe y ta duna sosten moral. E board di Giants Aquatics ta inmensamente agradecido pa e commitment cu e mayornan tin cu nan yiunan y cu Giants Aquatics Aruba.
E delegacion cu lo ta na Plantation, Florida di 5 pa 13 di december, ta consisti di 31 atleta, e mayornan y 2 coach y. Hefe di delegacion ta Zuleika Fernandes Perna-Silva.
Giants Aquatics Aruba ta sigui desaroya y materialisa su vision, treciendo innovacion den mundo di landamento na Aruba.
