Diadomingo mainta den Club San Martin, ex-hungadornan di baseball di 43 y 45 anja di e ekipo di Frisian Flag a dicidi di bini hunto pa honra dos persona pa nan masha special den Casildo y Mencho van der Biezen. E ex-peloteronan aki tur e hunga bou di e dos baluartenan aki cu no solamente e sinja nan e deporte di baseball pero a sa na guia cada uno como personanan ehemplar den nos comunidad. Y pa esaki nan semper lo ta masha agradeci na coach Mencho y coach Casildo. Den nan tempo coach Mencho y coach Casildo a hiba e dos ekiponan aki pa varios anja na e titulo di campeon den baseball infantil/hubenil.
Prome a inicia e mainta cu un santo sacrificio di misa na Imaculata Concepcion unda a haya e bendicion di Nos Creador. Despues a sigui cu un happening den Club San Martin. Despues a a hiba palabranan elocuente pa Mencho y Casildo a saca portet y a otorga na Mencho y Casildo un bunita obsekio como recuerdo pa nan bunita trabou desplega na e dos ekiponan aki y na e deporte di baseball. Mas cu claro a sigui cu un brindis te den oranan laat di atardi unda e tema tabata simplemente baseball.
Un pabien na e ex-peloteronan cu a tuma e bunita iniciativa aki pa honra nan ex-coachnan Mencho y Casildo awor na bida. Tambe un pabien na Mencho y Casildo pa nan bunita trabou desplega pa nos peloteronan di Aruba. Porcierto Casildo ta welo di nos astro catcher di Atlanta Braves, Chadwick Tromp.
