Siman pasa nos di 297sports como media deportivo a realisa un biahe pa Atlanta, Georgia riba invitacion di Eddie Peterson alias Jan Poets unda nos a haya e oportunidad pa entrevista peloteronan profesional di Aruba y Corsow militando den Major League Baseball. Den e caso aki nos a combersa cu e catcher Arubano di Atlanta Braves, Chadwick Tromp como tambe e pitcher di Corsow, Kenley Jansen di Boston Red Sox y e shortstop di Corsow, Ceddanne Rafaela. Mester bisa cu mirando e tempo corto cu cada hungador tini, e tabata dificil pa combersa cu Ozzie Albies ya cu e ekipo ta warm-up, batting practice y despues drenta camerin mesora te ora di wega.
Riba e prome y di dos dia nos por a subi e tereno y mira e peloteronan den nan warming up y mas cu claro por a saluda nan y hiba un combersacion corto cu cada uno. Hopi mucha y nan mayornan den stadion pa asina saca potret y firma balanan di baseball. Tambe nos por e estreya di American Football di Atlanta Falcons, runningback Tyler Allgeier hiba combersacion cu Matt Olsen cu ta e estreya di Braves. Durante e warm up nos a para serca di Ozzie Albies pa asina mira su persona den un session di fildeo esaki ta conta tambe pa nos astro Chadwick Tromp cu sin duda ta masha keri serca su compañeronan di Atlanta.
Despues di Atlanta a toca turno na Boston Red Sox y aki mas cu claro nos por a presencia e rookie di Corsow Ceddanne Rafaela riba tereno, hopi talento pa parti. Y tambe por a mira Kenley Jansen durante su warm up di pitcheo. Riba e prome dia nos a entrevista Kenley Jansen den e dugout bishitante. Notabel ta cu Kenley ta masha keri y respeta pa tur hende afilia na tanto Red Sox como tambe Braves.
Riba e di dos dia nos a bay trempan Truist Park unda riba tereno nos a haya e oportunidad di entrevista nos astro catcher Chadwick Tromp. Y net prome cu drenta camerin nos a haya un momento pa entrevista e hoben rookie di Red Sox, Ceddanne Rafaela cu sigur tambe ta masha popular mes serca e fanaticada di Boston den stadion. Ambos anochi nos a sinta den e Press Box di Braves unda nos come dinner y presencia e wega for di un bunita bista tras di e homeplate. Nos a probecha di cana rond den stadion Truist Park y disfruta di e ambiente y graba algun introduccion pa e cobertura di Poets Tv Aruba. Remarcabel ta cu ambos dia e stadion tabata prakticamente sold out cu alrededor di 40 mil expectador. Un bunita stadion cu hopi ambiente rond di e stadion cu varios restaurant y bar pa e fanaticada cu ta mira e wega. Atlanta Braves a gana ambos wega di Boston Red Sox. Lamentablemente nos astro Chadwick Tromp no a hunga den ambos wega, pues nos no a mire hunga y tampoco Kenley Jansen mirando cu Atlanta tabata tin ambos wega gana cu diferencia di score basta bon.
Na banda di e baseball, nos a presencia e acto di firmamento di e hoben artista local Omar Pierce cu KJ74 cual ta e agencia di musica di Kenley Jansen y un productor famoso mericano ganador di Grammy Award. Nos a bishita e hotel unda Boston Red Sox ta hospeda y aki nos a meet cu Kenley Jansen, Chadwick Tromp y Omar Pierce. Por ultimo nos di 297sports kier a gradici Eddie Peterson alias Jan Poets di Poets Tv Aruba pa e oportunidad aki. Un bunita momento pa conoce e mundo di baseball profesional di serca y un recuerdo inolvidabel pa por a entrevista e peloteronan Tromp, Jansen y Rafaela den Truist Park, e cas di Atlanta Braves.
Keda pendiente pa e entrevistanan via e canal oficial di Jan Poets y Poets Tv Aruba. Y tambe riba e combersacionnan sosteni cu e peloteronan profesional Chadwick Tromp, Kenley Jansen y Ceddanne Rafaela.
