2.1K
Algun rato pasa nos a haya e tristo noticia cu casa di nos gran amigo Jonathan Goitia di Goitia Tennis Performance, esta Dhayene Goitia a bay laga nos. Dhayene pa hopi aña a lucha contra di un enfermedad cu e tabata tini. Na bida Dhayene tabata e incansabel motor tras di Goitia Tennis Performance un scol di tennis di e y su casa Johnny. Apesar di tur cos, semper Dhayene tabata presente na tur evento di tennis cu wordo organisa na Aruba Racquet Club y tabata coordina henter torneo pa tur cos cana den bon direccion. 
Mi persona conoce Dhayene y Johnny for di tempo cu nan mes tabata tenista na Eagle Tennis Club serca e baluarte meneer Eddie Ras, den feliz memoria. Mi semper tabata tin un respet y admiracion grandisimo pa Dhayene. Su cooperacion di añas brinda na mi persona como miembro di prensa ta uno cu semper mi lo keda recorda. Na 2017 mi a haya un reconocimento for di Goitia Tennis Performance pa nos cobertura brinda na e deporte di tennis, paso ora bo papia di torneonan di tennis na Aruba ta Johnny y Dhayene tabata tras di esakinan.
Nos di 297sports kier a manda un palabra di profundo condolencia y hopi forza na Jonathan, Dhaena, D’John como tambe na henter famia, amigo y conocirnan sin lubida e mundo di tennis cu e perdida super grandi aki. Cu Dhayene Sosega na Paz den Brasa di Señor Dios.
