Team Bigshow Academy a organisa dos dia di evento exitoso

by Seever Krozendijk
576 views

Team Bigshow a organisa un seccion di informacion exitoso conhuntamente cu Monroe College den Collegezaal di Colegio EPI y tambe un dia di showcase pa peloteronan.

Diaranson 8 di mei, e sala tabata yen di studiante y mayornan entusiasma buscando perspectiva riba e ofertanan educacional cu Monroe College tin pa ofrece. E anochi a cuminsa cu Sr. Elwin Rincones, presidente di Team Bigshow. El a duna splicacion di e mision y vision di e organisacion y e la enfasis riba e importancia di e seccion di informacion aki. Rincones a enfatisa e rol fundamental cu educacion y deporte tin pa brinda oportunidad na e studiantenan ambicioso. Su discurso inspirativo a subraya e importancia di uza deporte como un caminda pa yega na educacion mas halto.

Despues di e discurso di Sr. Rincones, Sr. Mike Morales, Regional Recruiter y Sra.Lorraine Myers, Director of International Admissions di Monroe College a comparti informacion di e institucion. Nan a elabora riba e curiculo, bida como studiante, costo y demas aspecto cu ta haci Monroe College un opcion atractivo pa futuro di e studiante.

Ademas di e representantenan di Monroe College, Education USA Aruba tambe tabata presente na e evento. Nan a informa e participantenan tocante e variedad di servicio cu nan ta ofrece pa sostene e studiantenan den nan meta pa studia na Merca.


Diahuebs 9 di mei, Team Bigshow Academy a organisa un seccion di showcase pa peloteronan di baseball bou guia di Sr.Mike Morales y Sr. Elwin Rincones. Tabata un mainta exitoso cu participacion di 28 pelotero. Asina ta crea un gran oportunidad pa nos hungadonan local combina nan deporte cu nan educacion.

Team Bigshow ta gradici tur e participantenan cu a contribui na e seccion di informacion aki y tambe e seccion di showcase na Starsfield cu tabata uno sumamente exitoso. E organisacion ta keda comprometi pa facilita mas di evento manera esakinan den futuro, cu e meta di empodera e studiantenan y e mayornan cu e conocemento necesario pa yuda nan scoge nan trayecto educacional den futuro.

 

Related Articles

297 Sports is a sport news website based in Aruba – 297 is the country code. We cover all domestic – and international sport news where Arubans are involved. 297 Sports is the leading provider of sport news in Aruba. It is run by Seever Krozendijk. Contact us for news coverage or for advertising on our website.

EMAIL
info@297sportsaruba.com

©2022. 297 Sports Aruba. All Rights Reserved. Designed and Developed by FM Web Designs