1.3K
Di un total di 7 evento den landamento artistico, Aruba ta logra conkista 6 medaya den e Weganan Centro Americano y Del Caribe San Salvador 2023. E logro aki ta uno cu lo pasa pa historia mirando cu nunca antes un delegacion di landamento artistico no a logra asina hopi medaya den un wega asina importante pa nos pais.
E atleta elite Kyra Hoevertsz ta logra medaya di Brons den solo technico y medaya di Plata den solo free. Den duet, Mikayla Morales y Kyra Hoevertsz ta logra den duet technico medaya di Brons y den duet free medaya di Plata
Team Aruba ta gana medaya di Brons den Team Tech y un medaya di Brons cu nan acrobatic routine. Team Aruba ta conta cu atletanan Meghan Tromp, Melanie Tromp, Maria Jose Salazar, Emylaine Mathilda, Kyra Hoevertsz, Mikayla Morales, Avigayle Tromp, Angelina Hamoen, Harianny Abreu.
Es mas e hobencita, Emylaine Mathilda ta di apenas 14 aña di edad a bira e medayista mas hoben cu a logra triunfa cu un medaya den Weganan Centro Americano y del Caribe pa Aruba.
Por ultimo, tras di tur logro di cada atleta tin e coachnan y e team aki a ser guia pa Coach Ila Brandimarte y coach asistente Cora Mora Martinez.
