Bunita iniciativa di Patrishi Sports Aruba cu a introduci e Kids/Youth Team Ranking Trophy cu den e prome kwartaal a bay pa Eagle 297 Runners
Despues di e exitoso Kids & Youth Event #5, na e Harry Jansen Boulevard race, Patrishi Sports a otorga e trofeo Kids/Youth Team Ranking Trophy na e team cu ta lidera e competencia den e categoria aki esta Eagle 297 Runners!
E Team Ranking a keda introduci den 2023, unda ta focus den e prestacion di e ekipo completo como un grupo colectivo. E teamnan di Aruba ta yuda nan compañeronan masha hopi mes pa loke ta entrenamento, conseho, support, y apoyo ora esaki mester y esaki sin duda ta e forma como ekipo pabo crece den bo deporte. e premio mas cu claro ta pa stimula tur ekipo pa keda traha duro y focus henter e temporada di coremento na Aruba. Esaki lo yuda e team haya mas reconocimento eyfor pa nan tremendo esfuerso y labor. Tur ekipo kier demostra e mihor di nan mes henter aña y e premio aki lo stimula cada uno pa keda focus den esey.
Den e Kids/Youth Team Ranking Leader, Eagle 297 Runners tin 328 punto dilanti Turtle &-21 Athletic cu tin 250 punto na di dos lugar y Alive Running Team Aruba cu 218 punto ta na di 3 lugar.
Un pabien na Eagle 297 cu nan premio y na Patrishi Sports cu e tremendo iniciativa.
