SETAR NV nos compania nacional di telecomunicacion ta orguyoso di nan dos empleadonan cu a recientemente a participa y a completa exitosamente nan marathon. Edeline Weller y Urvin Robert a participa den e famoso Abbott World Marathon Majors.
Edeline a participa na e di 49 edicion di BMW Berlin Marathon 2023 cu a tuma luga na e ciudad di Berlin, Alemania. Edeline a completa su di dos (2) strea cu un tempo di 04:14.55. E experiencia di e marathon na Berlin tabata uno inolvidabel. Edeline ta agradecido di por a participa na esaki exitosamente cu su grupo di amistadnan cu a representa Aruba. “Mi ta hopi contento di tabatin mi famia cu a acompaña mi na e gran evento deportivo aki” Edeline a expresa.
Edeline ta gradici tur persona cu a sostene, su team Runners Unite Aruba, SETAR NV pa kere den su persona y cu semper a sostene su hobby y pasion den coremento. Edeline ta desea ta pa encurasha e empleado nan pa participa na actividad físico y keda den movecion. “Bo no mester ta e miho, djis bo mester ta consistente, kere den bo mes, kere den bo soñonan y sa cu bo a prepara pa esaki”, Edeline a enfatisa. E dedicacion ta laga bo sobresali.
Pa Urvin esaki tabata su prome experiencia di marathon. Urvin a participa na e 45 edicion di Bank of America Chicago Marathon 2023 y a dedica e marathon aki na su kerido tata den feliz memoria. Urvin ta hopi contento di a finalisa e marathon cu exito. E tabata un experiencia unico yena di emocion. Urvin kier gradici su casa y famia pa e tremendo sosten y su team Pegasus Aruba, na SETAR NV y Sra. Kimberly Boekhoudt pa wak e importancia den deporte y pa su sosten.
Gerente, staf y personal di SETAR NV ta felicita nan dos (2) empleadonan alabes coredo di SETAR Runners cu nan tremendo participacion. Un danki na 297Sports pa ta semper mantene e comunidad di Aruba informa di tur evento deportivo.
