746
E Nations League di CONCACAF a bay super bon pa e seleccion nacional di futbol cu den e Grupo B di Liga C a triunfa den tur cuater weganan hunga pa un total di 12 punto. Cu esaki Aruba ta promove pa Liga B di Concacaf Nations League.
Aruba tabata den grupo hunto cu US Virgen Island y Cayman Island y aki nos seleccion a sa na gana tanto na cas como e weganan como bishitante. Den luna di september Aruba a hunga nan prome wega na Cayman Island unda nos seleccion ta gana cu e score di 2 – 1. Na oktober, Aruba ta hunga nan prome wega na cas den Guillermo Trinidad despues di casi 7 anja di ausencia. Mas cu claro nos seleccion tabata hambra pa hunga dilanti nan publico y no ta defrauda y ta gana US Virgen Island cu e score di 3 – 1. Por ultimo den luna di November, Aruba su seleccion ta hunga dos wega, unda den e prome nos seleccion ta gana US Virgen Island cu e score di 4 – 1 den e Bethlehem Soccer Complex na Virgen Island. Algun dia despues nos seleccion ta regresa den stadion Guillermo Trinidad y ta clausura e torneo di Nations League cu un victoria aplastante di 5 – 1 contra di Cayman Island.
E homber gol y assist di Aruba sin duda tabata Rovien Ostiana cu ta anota 5 gol y p9ercura pa 3 assist. Na banda di esaki Rovien ta anota un di e golnan di mas bunita di e Nations League escohi pa ESPN Deportes cu un tiro di casi 50 meter cu ta sorprende e keeper di Virgen Island. E otro anotadonan di gol di Aruba tabata Darryl Baly, Diederick Luydens, Mishawn Molina, Jaydon Dania 2x, Benjamin Maria 2x y Terence Groothusen 2x. No por keda sin menciona e tremendo labor di keeper, Matthew Lentink cu a haya solamente 4 gol encontra. E seleccion di Aruba ta anota un total di 14 gol.
Un palabra di elogio na henter e seleccion di Aruba bou guia di DT Marvic Bermudez cu a conoce su mihor prestacion den hopi anja ganando tur nan weganan den un torneo di Concacaf. Na Aruba e publico sin duda a disfruta di nos seleccion unda nos hungadornan tur a resalta enorme riba tereno.
