1.1K
Nos seleccion Girls U14 a cuminsa e torneo di CFU Girls U14 den bon pia na e isla Caribense di Antigua. Cu un hoofdrol sigur pa Zyana Rogers como tambe Sharrienne Vrolijk nos damitanan ta gana Turks & Caicos cu e score di 3 – 0. Mester bisa cu Aruba ta sali mesora busca e atake cu un Zyana Rogers hambra padilanti buscando e gol di bay ariba. Na di 3 minuut den un solo rush, Rogers ta bay laga e linea di defensa y ta schuif e bala bunita pa e 1 – 0. Algun rato despues un bes mas, Rogers ta core bay laga tur hende rumbo gol y aki e bala ta dal na e keeper pero den e rebote, Sharrienne Vrolijk atento ta lob e bala over di cabes di tur hende unda e bala ta cay den gol pa e 2 – 0. Net prome cu half bay aden atrobe Zyana Rogers a demostra su clase ora riba un pase di Vrolijk e ta anota su di dos gol di e mainta pa e 3 – 0.
Den e di dos tempo e ritmo di e wega a baha un poco unda Aruba su oportunidadnan a bira menos, e calor sin duda a hunga un rol ya cu esaki tabata segun nos a compronde insoportabel. Turks & Caicos a opta pa hunga mas defensivo y aki algun tiro liber di Aruba cobra pa Loredana Neppi a crea peliger dilanti e gol. Aruba su keeper mes no a haya mucho trabou di haci y casi ningun momento no tabata den peliger. Ta bon pa bisa aserca cu e torneo di CFU ta conoci como uno unda tin regla cu tur hungador mester hunga tanto cantidad di minuut, pues constantemente lo tin cambio ta tuma lugar. Den un torneo unda bo mester mira e desaroyo di cada hungador, pa CFU esaki ta hopi primordial y importante, sigur den futbol femenino cu e bira uno popular den e region di Caribe.
All by all un victoria super importante y cu den tipo di torneonan asina ta bon pa habri cu un victoria. Pabien na nos muchanan y e staf tecnico cu ta haci un tremendo trabou. Mañan pa 2or di merdia Aruba tin nan proximo encuentro contra di Cayman Island.
ARUBA ARIBA
Photo: CFU
