E aña 2024 tabata ta un tremendo aña pa nos Reina di Windsurfing Mundial, Sarah-Quita Offringa cu a corona su mes como e Triple PWA World Champion logrando e titulo mundial den e disciplinanan di Freestyle, Slalom X y Wave. Cu e titulonan aki Sarah Quita ta logra bira 25 bes Campeon Mundial na e bunita edad di 33 aña. Sarah-Quita ta logra su titulo mundial di Wave na Maui, Hawaii riba e ultimo fecha y competencia di PWA World Tour. Nos Reina Mundial di windsurfing a logra su di 4 titulo mundial den WAVE. Na Fuerteventura, Islas Canarias Spaña cual a bira e cas di Sarah Quita, e Reina di Aruba ta logra su di 15 titulo mundial den Freestyle windsurfing, un logro grandisimo. Tambe na Fuerteventura, Sarah Quita ta logra bira campeon mundial den Slalom X su di 6 titulo mundial overall den Slalom. Otro highlight di Sarah Quita den 2024 ta tur e 4 caredanan cu e ta gana den e Women Slalom X Elimination na Pozo, Izquierdo.
15x PWA Women’s Freestyle World Champion
2008, 2009, 2010, 2011, 2012, 2013, 2014, 2015, 2016
2017, 2018, 2019, 2022, 2023, 2024
6x PWA Slalom World Champion 2011, 2015, 2016, 2017
2021, 2024
4x PWA Wave World Champion 2019, 2022, 2023, 2024
Aña 2024 ta sin mas un spectacular unda Sarah Quita ta logra conkista 3 titulo mundial den un solo aña den tres disciplina totalmente distinto di otro esta Freestyle (maniobra liber) Slalom X ( careda cu obstaculo) y Wave nabega riba olanan grandi. E unico regatista Arubiano cu ta logra 3 titulo mundial den un aña den tres diferente disciplina.
Na banda di su competencia, Sarah Quita a organisa 5 Camp di windsurfing hunto cu Oda Johanne esakinan na Aruba, Bonaire, Karpathos y Brazil. Alrededor di 60 hende cu nan a coach y sinja un tiki mas di e deporte. Pa 2025, Sarah Quita ta spera di aumenta e camp nan y coach mas hende. E participante nan hopi biaha ta pasiona caba di e deporte y nan kier sigui mehora pa nan por disfruta mas ainda di windsurf
