Un wega amistoso cu mester a tuma lugar for di basta tempo atras pero debi na e pandemia tur cos a para te cu diaranson anochi ora cu e ekiponan di Superfood Plaza y Renaissance Wind Creek a topa otro cara cara na veld di Franklyn Bareno na Piedra Plat.
Awo nos a bin compronde cu e ekipo di Superfood Plaza tabata e ekipo invicto sin perde un wega y a reta e fuerte ekipo di Renaissance Wind Creek cu varios estelar di nos futbol local den dje. Wel nos a mira un bon wega riba nivel unda Renaissance tabata dominante cu varios oportunidad morto di gol, pero tabata SuperFood Plaza cu pa medio di un bon hugada individual di e delantero Arvin Solognier cu un solo rush ta bay laga henter e linea di defensa di Renaissance pa habri e marcador 1 – 0. Despues di e gol Renaissance ta cuminsa pone presion unda a haya varios chens morto pa medio di Andre Kelly, Emerson Leocadio y Devis Oliveros, pero ningun di tres nos por a haya e net di e gol.
Na final e wega a caba 4 – 3 pa Renaissance Wind Creek cu ta kibra invicto di Super Food Plaza Aruba. E golnan di Renaissance a wordo anota Sidney Kelly, Claudio Cavalcante, Peter Yanes y Devis Oliveros. Como man of the match a keda Ryan Bregita!
Mas cu claro Super Food Plaza no ta laga cos aki y a pidi mesora un revancha contra di Renaissance Wind Creek.
