1.2K
E problema di violencia y insulto di referee di futbol semper a existi no solamente na Aruba pero na tur parti mundo. Awo claro cu den tur esaki, e reglanan combina cu e sanccion mester ta uno fuerte cu lo preveni cu e lo bay pasa menos, paso stop esaki esey nunca lo pasa. Pa esnan cu ta sigui e deporte di serca sa cu cada aña tin un of mas caso di violencia y insulto contra nos refereenan na Aruba. Den e fin di siman tras di lomba, awa a pasa hariña unda referee Bedoya a wordo agredi pa un dirigente den un torneo di futbol infantil. Un suceso sigur di lamenta mirando cu pa e deporte di futbol y deporte engeneral ta perdedor so tini den situacionnan asina.
Awo den algun comentario cu nos por a lesa riba media social tin algun punto cu a wordo trece padilanti cu a hala nos atencion.
Un referee a comenta cu e motibo di protesta tabata mas bien pa no solamente proteha nan mes, pero pa trese disiplina y respet bek den futbol local cual a bira pio. Loke ta interesante ta cu e ta sigui bisa cu e clubnan di futbol a vota contra pa hisa e castigo disciplinario pa diferente ofensa. E regla nan disciplinario ta mas cu 15 aña biew sin cu nunca a ahusta esakinan. Awo e ta mustra cu e clubnan mes no kier esaki y a vota contra. E ta sigui menciona cu un president di un club a confirma esaki y tambe e informacion a sali den un charla cu Presidente di AVB a hiba tur e referee nan presente.
Di otro banda, dos dirigente di club a menciona cu ningun momento clubnan a vota contra e proposicion pa hisa castigo disciplinario. Nan ta bisa cu e clubnan ta di acuerdo cu mester hisa e castigo, pero cu clubnan a pidi AVB pa laga e proposición di Castigo wordo trata den un sigiente reunion caminda tur partido ta bon prepara y cu tin un mihor estudio con pa aumenta castigo. Ningun club cu ta traha pa bienestar di deporte lo aplaudí violencia ni ta sostene esaki. E liña di disciplina mester ta mescos pa tur hende tanto pa Hungador, Entrenador, Dirigentenan y Referee tambe.
Nan a experencia mal momento cu referee cu mester wordo sanciona. Pero no tin ningun disciplinaire maatregel den reglamento pa cu codigo di conducta pa un referee, solamente AVB ta tuma desicion riba cualkier situacion of keho cu por wordo entrega contra un referee. Den reglamento local mes no tin nada ancra. Loke tin ta un Reglamento di Castigo pa situacion di agresion di tur indole riba hungadornan.
E dirigente ta bisa tambe cu si den e charla Presidente di AVB ta bisa cu clubnan a vota contra anto Presidente no ta papia berdad. Loke Presidente mester informa ta cu a bin un amienda y cu a wordo segunda pa más club. E dirigente ta reitera cu e clubnan presente nunca a bisa di ta contra di aumento di castigo pero cu e mester wordo trata cu mas estudio y cu e liña ta core pa tur hende igual y no solamente pa hungadornan. Pa culmina e ta bisa cu mester bin mas proteccion pa referee, y e ta di acuerdo cu esaki pero e ta di acuerdo tambe cu código di conducta y disciplina mester core pa tur hende.
Pa loke ta e ponencianan aki riba menciona mester bisa cu cosnan ta mucho cla. Aki ta trata un asunto di ken ta papia berdad y ken no, cual ta hopi fastioso ora bo ta trata cu un punto asina importante cu ta e Codigo di Conducta. Mester resolve tur esaki na bienestar di futbol. Ta bon pa bisa aserca cu e deporte rey ta hopi den luz negativo, e ultimo dos simannan aki cu retiro di secretario general, tres protesta den apenas comienso di campeonato, refereenan ausente na wega y awor violencia contra referee di parti dirigente. Mester trece e paz y trankilidad liher den tur e asuntonan aki.
Nos lo bay sigui esaki di serca.