347
RCA y Britannia a percura pa un berdadero show den stadion di Frans Figaroa na Noord pa loke ta e gran final den e categoria U13 Oro. Mester bisa cu nos por a mira un prome tempo Britannia un tiki mas mihor den toke di bala, den medio campo nan a domina mientras RCA a defende e ventaha di 1 – 0 cu e gol anota pa Drexton Silva y a hunga e bala largo y purba na sorpresa e defensa di Britannia. Ambos ekipo a haya mas oportunidad pero tur cos a keda na un gol den e prome tempo.
Den e di dos tempo, Britannia a haya un tremendo oportunidad di gol despues cu Born de Nobrega ta laga dos defensa su tras pero su cruse tabata mucho duro dilanti gol. Un rato despues tabata e delantero di RCA, Kimani cu a haye su so cu keeper pero no a probecha. Ambos ekipo a lucha duro pa buscando e gol. Faltando algun minuut pa final, e hungador Quincy Nelisse ta percura pa e empate 1 – 1 cu un tremendo rebound tras di e area penal.
Asina tambe e wega a keda empata 1 – 1. A bay over na e tironan di penalti. Aki keeper Juan Luis Cardona tabata e homber grandi bou di e latanan pa RCA unda e ta para 3 penalti pa duna RCA e titulo. Na final AVB a reparti e Copa di Campeon y di dos lugar na e dos ekiponan.
Pabien na RCA y Britannia pa un tremendo final di futbol.
