913
Dialuna anochi, RCA y Estrella a enfrenta otro den un wega valido pa e prome ronda. Un wega cu a para anja pasa y dialuna a continua cu esaki den stadion di Frans Figaroa na Noord.
Mester bisa cu den e prome tempo, RCA a hiba a dominio di e wega unda a presiona Estrella bon y aki a crea oportunidad di anota gol. Na algun ocasion, RCA tabata serca pero no a logra anota unda sea ta portero of e linea di defensa oranjo a impedi esaki. Estrella di nan banda no a yega mucha serca di e gol defendi pa portero Abdul cu algun tiro aki aya. Estrella tabata falta e homber peligroso y di accion dilanti gol. Na di 36 minuut, RCA ta anota e 1 – 0 pa medio di John Silva cu tiro duro tras di e area penal. Tres minuut despues Kevin Peña ta anota e 2 – 0 tambe cu un tiro di leu despues di un bunita combinacion cu John Silva. Asina halftime ta bay aden.
Den e di dos tempo, RCA ta sali brabo unda rapidamente nan ta anota e 3 – 0 pa medio di John Silva. Despues di e gol, Estrella a hunga mucho mas mihor y a busca tur manera pa corta e ventaha. Hopi atake a bini banda drechi cu John Zara, Robert Duran y Fernando Rasmijn. Tur a haci nan esfuerso pero no por a pasa portero Abdul cu a salba RCA na dos ocasion clave di gol. E wega a bira basta pareu pero e daño di e golnan mas trempan ya ta haci. Faltando 1 minuut pa e wega termina, un combinacion perfecto entre e defensor Roan Petronia y e delantero Kevin Peña ta pone e ultimo hinka un bunita gol pa e 4 – 0. RCA ta logra bay cu e tres punto y ta cla pa Caya 6.
Awe diamars lo tin e loting Liga Oro y Plata Division di Honor como tambe e loting di Division Uno na e oficina principal di AVB na Noord.
