1K
E prome clash di aña entre Britannia y RCA den futbol femenino a tuma lugar diadomingo atardi na tereno di Britannia na Piedra Plat. Aki e dos rivalnan eterno den futbol femenino den e ultimo decada a topa otro. Un Britannia cu a inicia cu hopi presion riba RCA a domina den e medio campo y a ataka e gol tricolor varios biaha pero sin exito. Di otro banda RCA a keda hopi den defensa no por a sali facil y no tabata yega e gol contrario cu tiki hugada dilanti e gol contrario. Un cambio den medio campo pa RCA cu ex-hungador di Britannia, Amy Henao a pone cu RCA a bay mas den atake y a haya algun oportunidad chikito pero sin mucho peliger.
Na di 25 minuut, e medio campista di Britannia, Ashley Douglas ta cobra un tiro liber for di un distancia basta leu. Aki e portero Rich Croes no a calcula e bala bon y ta mira esaki pasa riba su cabez pa e 1 – 0. Net prome cu half, na di 41 minuut, RCA ta empata e partido 1 – 1 ora cu Lilianne Saladin ta anota e gol despues di un mal comunicacion den e parti defensivo di Britannia.
Den e di dos tempo, RCA ta sali brabo y ya na di 49 minuut nan ta anota e 2 – 1 pa medio di Izaline Angela. Asina tambe e partido ta termina cu victoria pa e ekipo tricolor contra di Lady Puma nan den e prome clash di temporada. Sin duda e publico a mira un tremendo partido di futbol femenino.