986
Diahuebs anochi na nan clubhuis na Solito, e organisacion tricolor a celebra nan di 90 aniversario den un ambiente familiar hunto cu e hungadornan, miembronan y invitadonan di honor.
Tambe a probecha di e oportunidad pa bautisa e uniformnan nobo di tur RCA su divisionnan di chikito te hoofdklas. E maestro di ceremonia, Erin Croes a habri e anochi unda su persona a yama tur presente un caluroso bon bini. Presidente di RCA, Jeff Lopez a hiba palabra unda e la recapitula e historia tricolor, un historia simplemente impresionante cu hopi triunfo y logronan. Minister di Enseñansa y Deporte, sr. Endy Croes y presidente di AVB, sr. Randolf Lacle tambe a hiba palabra na e ocasion aki. Den ambos speech a resalta e ehempel cu RCA ta pa hopi organisacion deportivo na Aruba, principalmente den futbol. E respet pa un organisacion asina grandi cu cada aña ta crece danki na su miembronan cu ta traha diariamente den forma boluntario pa e club. Tanto Minister Endy Croes como Randolf Lacle a otorga na presidente di RCA, Jeff Lopez un bunita obsekio pa cu e 90 aniversario tricolor.
A bay over na e bautismo di uniform di RCA cuminsando cu e mas chikitonan esta U5. Representante di Bohama – Proframe, Mandy Werleman-Leyenaar, e patrosinador principal di RCA a basha a tradicional champaña riba e uniform den presencia di e demas hungadornan. Y asina a bautisa e tur e uniformnan uno pa uno te cu Division di Honor.
Por ultimo a tuma un potret di tur e baluartenan di RCA hunto pa un potret mas cu claro historico. Di nos banda un pabien na e organisacion di RCA cu nan di 90 aniversario.
