1K
Nos a caba di ricibi e grato noticia for di e multi atleta, Amadee Nicolaas cu e tambe a caba di ricibi un invitacion pa participa den luna di oktober 2023 na e magno evento deportivo mundial esta VinFast IRONMAN World Championship na Kailua-Kona, Hawai. Despues cu algun dia atras nos por a mira cu e atleta Lana Gobert a ricibi e invitacion pa Kona, awor ta e atleta Amadee Nicolaas a haya su invitacion bon mereci. E competencia di 140.6-miya di recorido lo bira un test grandi di e curpa, mente y spirito humano pa e atleta profesional y di age group rond mundo.
Amadee Nicolaas sigur no un desconoci den e mundo di coremento, triathlon y ironman na Aruba a haya su invitacion despues di un tremendo prestacion durante e Ironman di Florida unda Amadee a logra un super resultado. Esaki a pone cu e organisadornan a manda un invitacion pa Amadee forma parti di e stage mundial di Ironman na Kona Hawaii. Amadee como multi atleta semper a traha duro y presta den gran forma na Aruba y den competencianan bishita den exterior. Semper Amadee a defende nos bandera den forma digno y saca bon resultado unda cu e la bay.
Awor Amadee Nicolaas y Lana Gobert lo bira e prome atletanan femenino den historia di e deporte di triathlon na Aruba cu lo participa den un mundial di Ironman.
Masha pabien Amadee Nicolaas.
