Diaranson mainta, durante un conferencia di prensa IBISA y Biking Squad Aruba a lansa e di dos (2) edicion di e Awareness Ride 2023 cu ta tuma luga diadomingo 29 di october proximo. E recorido ta di 44 KM y ta sali pa 6:30 di maita for di ex Bushiri Beach Hotel y lo bay rumbo Noord. E meta di e Awareness Ride ta pa conscientisa automobilista – y ciclistanan pa ora nan ta uza caminda pa ambos ta consciente di e reglanan di trafico, nan siguridad y pa duna otro respet. Tambe, pa e doñonan di cacho tene cuenta cu nan mascota pa e ta den cura mirando cu nan por ataca e ciclistanan cu consecuencia negativo.
E idea pa e proyecto di conscientisacion a nace aña pasa door di Sr. Rubert Paesch lider di Biking Squad Aruba y su ekipo. Sr. Paesch a trece dilanti nan inkietud- y preocupacionnan. Lamentablemente e ultimo tempo tin hopi accidente y/of incidente ta sosode cu ciclistanan riba caminda. Un otro problematica cu e ciclistanan ta topa cu ne ta cachonan los pafo di cura cu ta ataca y morde nan causando daño tanto fiscamente como material.
Minister Endy Croes a enfatisa cu e ta apoya eventonan asina cu ta conscientisa Pueblo di Aruba. Alabes mandatario di Deporte ta pidi cooperacion di tur automobilista pa tene cuenta cu e mainta aki y baha velocidad. Concluyendo, Minister Endy Croes ta felicita Biking Squad Aruba y IBISA cu e proyecto di conscientisacion aki y ta invita comunidad pa participa na e Awareness Ride 2023 dia 29 di october proximo. E ciclistanan cu ta desea di participa por registra via e link riba e pagina di Biking Squad Aruba.