Meanwhile nos ta 4 anja despues di e combersacion aki: E desaroyo di nos baseball na Aruba

Cuater anja pasa nos a publica e relato aki durante nos podcast den e temporada di pandemia na 2020. Fin di februari proximo lo tin eleccion pa e directive di baseball ABBA cual ta e federacion madre. Segun fuente fededigno awor aki ta sr. Raul Gei(president) so a keda den e directiva ayuda pa algun hende rond di dje. Ken lo bira e proximo directiva di ABBA ta interesante pa sa. Awor Januari a habri ki y ta turno pa e baseball Little League. Cu otro palabra nos ta caba(of no caba) y inicia cu un otro, sin evalua pa mehoracion.

Awor lesando e relato di 4 anja pasa cu tur e puntonan menciona pa e tempo ey, e personanan cu a bishita e podcast por conclui cu mucho no a cambia y nos ta mesun leu. E deporte di baseball ainda ta pasando den un incertidumbre sin salida, asina mes cu a bini aserca algun puntonan positivo. Aunke cu berdad a organisa por ehempel coaching clinic di USA baseball, pero mester purba na haci mucho mas cu simplemente un momentum. Den e parti colegial(scol), aki si nos por bisa cu mas hoben ta scohe pa bira Student/Athlete pa un mihor futuro. Nan ta sigura nan mes cu un estudio na banda di eherce nan deporte preferi. Alo largo majan nan por tin un trabou cu nan diploma. Manera nos a bin ta bisa caba, e iniciativa di Pro Line Baseball ta campeon unda a permiti tur esnan firma hunga, pero Pro Line no ta ABBA. Asina mes cu nos tin hopi bon pelotero, hopi talento pero tin hopi factor cu ta pone nos cay den minoria constantemente. Es mas nos peloteronan di Aruba awor no solamente ta activo cua seleccion cu Team Kingdom Hulanda so, pero awor hasta Corsow ta haci uso di nos peloteronan den nan seleccion. Tur esaki paso nos mes no tin seleccion pa anjas. ABBA supuestamente tin un debe grandi y parece esaki ta e obstaculo. Con grandi e debe ta? Esey ta e pregunta. Kizas Gobierno di Aruba y comercio lo por yuda den esaki, pa asina nos por cuminsa na sero bek cua seleccion. Nos arbitrahe, cuerpo di umpire, con nos ta na e nivel ey? Esaki a mira un adelanto paso mescos cu nos coachnan, nos umpirenan tambe tin cu upgrade. Otro ta di opinion cu mester lanta un bond nobo cu ta un Federacion pa Baseball y Softball style di Hulanda tin KNSBB y un dos hende vast den dienst paga cu ta un director y administracion pa atende asuntonan di Baseball y Softbal.

Na 2020 a wordo papia riba organisacion, boluntarismo, planificacion y e mas grandi, e union cu pa masha aña no ta existi. Nos coaches nan falta e papel nesecario pa traha cu nos muchanan, traha planifica pa un bon base. Pero awo e ta bini, si nos coachesnan logra un papel riba un bon nivel di baseball cu ta reconoci, nan lo mester keda traha den forma boluntario, sin haya recompensa? Esaki tambe ta un punto pa pensa riba dje. Awor aki ta mayornan ta esnan cu ta yuda pero no ta keda cu e ekipo. Berdad ta cu sin e mayornan aki no tin maneho, no tin baseball y mester ta agradeci cu nan ta duna un man. Otro remarke cu a bini padilanti ta ki dia organisatorisch ta bai tin mas consistencia considerando cu nos hoben peloteronan ta haci try out cu colegionan na Merca of ekiponan MLB cu kier sigi den baseball sea como carera of pa logra haya un scholarship. Pues cu otro palabra no mester hunga baseball di januari te cu december un campeonato. Por haci esaki di januari pa juli hunga campeonato, di augustus pa october mescos, pero laga di mita di october pa december espacio pa entrenamentonan specifico, clinicanan, programanan di pitcheo, programanan general di formacion fisico di cada atleta, curso pa coaches, umpires, ect. Tambe varios persona a haci cierto analisis con por drecha e baseball maximo esta Double A y tambe concentra riba e seleccion nacional. Nos a scoge dos di e analisis nan aki y pone nan riba un rij.

E prome analisis ta

1. Herzien di Statuut. E statuut mester wordo revisa pero pa hasi ABBA e moeder orgaan di baseball, otro organisacion nan manera Aruba Little League of cualkier otro liga cai bou di ABBA.
2. Un reglemento di campeonato mas efectivo pa tur club.
3. Tur organisacion mester tin su teamnan pa e siguiente categoria ABBA infantil te AA.
4. Inschrijf-geld ta 5000 pa full e organisacion. Dus di infantil te double A.
5. Workshop anual pa coaches.
6. Busca persona of compania cu sa haci marketing.
7. Un accountants bureau pa e book keeping.
8. Purba cera un contract cu sea Utilities pa un suma di 15.000- pa aña pa tres aña.
9. Na stadionnan Tur mucha ta drenta gratis mas esnan di 60+.
10. Hunga ariba diadomingo cu lo atrae mas hoben bin wak e grandinan.
11. Laga tur nos peloteronan firma hunga na Aruba sin tanto contratiempo.

E di dos analisis ta basa mas riba e diferente seleccion nan

Aki nos comercio mester hinka un suma cuantioso na sponsorship pa aña pa e plan di nos seleccion nacional di baseball.

A pensa riba;

1. Structura
2. Institui varios comicion pa control y day to day management
3. Upgrade di nos national team coaching staff y staf tecnico y medico
4. Prepara plan/programa di entrenamento pa e seleccion nacional
5. Selecion nacional mester cuminsa U12, U15, U18 y AA y entrena henter aña y hunga torneo internacional den region anualmente, kizas contra di Corsow, Boneiro, bin bek cu Weganan di Reino.
6. Increase budget door di marketing y partnerships cu comercio di Aruba door di stimula corporate social responsibilities
7. Institui trabou voluntario y comunitario pa nos national teams eherce den nan programa anual cual lo enhance leadership y market e loke nan ta haci pa crea y promove community work den sociedad.
8. Institui educational programs y huiswerkbegeiding pa yuda e atleta bira mihor studiante paso esey ta e meta principal. Crea un mihor hende pa nos comunidad.
9. Crea lasonan cu universidad nan Mericano pa nos atletanan por haya mas oportunidad di hunga baseball collegial.
10. Habri canal y purba busca ayudo di KNBSB, USA Baseball, ect . Esaki lo engrandece Aruba enorme, hopi pelotero di Aruba ta milita na Hulanda den e baseball maximo. Aki e interes lo crece.
11. Hiba e wega nan di Inter league di seleccion bek den cada districto
12. Split Aruba den Little league den dos liga

Duna nos bo comentario kiko abo ta haya cu mester drecha pa asina den 2024 nos baseball por cuminsa na dal stapnan padilanti.