Keyon Ashby, un bunita ehempel di un atleta cu diabetes typo 1 y hunga baseball na nivel mundial.

Actualmente tin varios di nos peloteronan local ta reforzando e seleccion di baseball Hulandes den e Mundial di baseball U18 na Taiwan. Nos peloteronan ta sobresali y a haya varios admiracion di tur esnan cu ta sigui nan prestacion nan di cerca. Un di e hobennan aki ta outfielder Keyon Ashby cu nos a admira den varios hugada clave di Hulanda. 

 

Nos conoce Keyon y su famia un tiki di cerca y sa cu pa su persona e esfuerzo pa drenta e seleccion di Hulanda no tabata nada facil. Nos conoce Keyon como basketbolista y beisbolista hunto cu su ruman Jaydward y tata Edward. 

Na 2018, Keyon a keda diagnostica cu e enfermedad diabetes typo 1, cual sin duda tabata ta un noticia fastioso pa cualkier hoben cu tin un soño deportivo. Pero esaki nunca tabata un obstaculo pa Keyon di no praktica mas e deportenan cu e gusta. Dado momento Keyon a pone basketball un banda y sigui cu baseball. Su soño ta pa yega un dia hunga riba nivel di mas halto den e deporte aki. Algun siman atras, Keyon su soño a bira realidad ora cu Hulanda a yame pa forma parti di e seleccion U18 cu lo hunga e Mundial di baseball Hubenil na Taiwan.

 

Keyon ta un muestra cu bo por praktica deporte riba nivel halto, no obstante e enfermedad cu bo tini of sufri di dje pero cu abo mester sa con pa regula bo curpa y sigui pusha bay padilanti. Claro cu e esfuerzo ta poco diferente na un hende normal sin enfermedad, pero e ta posibel anto cien porciento. Tin dia cu lo ta mihor cu e otro, pero e obstaculo ey tambe lo bo surpasa, si bo tin un meta fiho poni pa logra. 

 

Keyon a manda nos un quote cu semper e la usa pa motiva su mes. E quote ta bisa asina ki; ‘No matter how much life knocks you down… get back up and give it your max’, Keyon Ashby. Un quote cu a juda Keyon den su trayectoria cu for di 2018 e la wordo diagnostica cu Diabetes typo 1. 

 

Por ultimo Keyon y su famia kier a gradici tur hende cu a apoye, sostene y kere den dje from day 1, specialmente Dr. Louise Rafael-Croes cu semper a cuide cu hopi amor y dedicacion

 

Pabien Keyon Ashby, un bon ehempel pa nos hobennan cu kizas ta pasando den e mesun situacion cubo. Pero cu perseverancia, fe y determinacion, e logro lo ta mas cerca cu nunca.