1.2K
Ora bo kere den bo mes tur cos ta posibel den e bida aki – IRONMAN
Nos a combersa cu e multi atleta Romar Arendsz cu den forma exclusivo via 297sports kier a comparti un noticia super grandi pa su persona.
Humilde y honra mi kier anuncia cu mi a logra e 2023 clasificacion pa IRONMAN WORLD CHAMPIONSHIP, na Nice, France.
![](https://297sportsaruba.com/wp-content/uploads/2023/08/IMG-1369-205x300.jpg)
E caredanan di aña pasa a duna e magia. Mi a hera e podium den e half distance Ironman na Panama, pero a mantene mi vison pa e siguiente half distance y PR na Oregon marcando un 4:26 y translada e full Ironman na Cozumel marcando un otro PR di 10:11 y asina clasifica pa e IM WC finalisando den e top 10 den e category.
“Mi ta super orguyoso dimi mes e aña aki cu Gold AWA (All World Athlete) IRONMAN – cu ta nifica e top 2% age category masculino na mundo como un Arubiano naci y lanta riba e isla aki” Romar ta conta nos
Romar ta sigui; “Awe, mi ta na top di mi prestacion den e bida aki como un triathlete. Tur e logro di bida aki mi ta duna na Nos Creador cu a dunami e oportunidad y talento pa haci tur esaki un realidad. E ta continua na revela cumi deseonan no ta pa sali y tuma pero mas bien pa ricibi”.
“Esaki mi ta dedica na mi mayornan, mi ruman muhernan, mi casa y yiunan. Nan mi pilarnan y ta pushami den e dushi bataya aki. Tambe mi coach Miguelangel Ponte “multisportcoach” cu for di dia uno semper a kere den mi y a mustrami un forma diferente den entrenamento y prestacion. Siguiendo su numbernan y kere den su persona, mi a logra yega mi potencial. Si e no tabata un proceso facil y sigur doloroso dia aden dia afor pa 8 aña, 7-dia pa siman, 365 dia den un aña. E tabata manera un montaña rusa subiendo te na e top di e sero. Pero awe, mirando bek atras di tur loke mi a logra cu ami a kere cu tabata imposibel. Mi no por lubida den e delaster dos aña, mi entrenador personal y “sports psychologist” Rashyd Curiel cu e desaroya e mindset y forza cu mi tin mester pa cada competencia”, Romar ta conta.
![](https://297sportsaruba.com/wp-content/uploads/2023/08/Mama-y-Tata-300x200.jpg)
Loke a haci tur esaki mas special ta cu e aña aki e multi atletanan femenino, Lana Gobert & Amadea Nicolaas tambe a logra nan clasificacion 2023 unda nan lo representa Aruba na Kona, Hawaii y e competencia masculino lo ta e aña aki na Nice, Francia. Romar ta deseanan un tremendo competencia, respet ladies.
Por ultimo, Romar Arendsz kier a duna un shout out special na su sponsornan, amigonan, coleganan, y fanaticonan cu ta sigui su persona di serca y cu a apoya y sostene den tur e añanan aki. Danki na nan pa e energia positivo y kere den su carera como atleta.
Romar su careda na Nice lo ta 10 di september, 2023.
Danki di curason na;
Total Service
Setar
Kooltemp
Cuts & Curves
Q-credits
Massage Therapy Aruba
Tastebuds Café
FX Sports
Zeerovers
Driftwood
297 Sports