364
Na vispera di e World Baseball Classic 2023 unda varios di nos peloteronan local ta participando cu Team Kingdom of The Netherlands nos kier a recorda e bunita momentonan con nan a cuminsa nan carera den e deporte di baseball na Aruba esaki den liganan infantil y hubenil.
Sigur nos mester ta orguyoso di e peloteronan aki cu diamars lo ta riba e plataforma mas grandi di e baseball mundial cu Team Kingdom enfrentando Cuba na Taiwan. Cada un di nan a traha super duro pa logra un carera den baseball y awe nan a cay den miras di Hulanda pa asina haya e oportunidad unico aki den bida. Pa algun e no lo ta nan prome biaha pero pa e mayoria si. Como Arubiano nos mester ta sinti nos mes bon pa mira e hobennan aki den e mundial di baseball.
Nos como colaborador deportivo a sigui varios di e peloteronan aki for di tempo cu nos a haya e oportunidad di traha den media esaki for di 2005. Nos a buska potretnan for di 2006 – 2011, tempo cu e hobennan aki a cuminsa desaroya nan mes como bon peloteronan den baseball.
Di aki banda nos kier a desea Antwone Kelly, Ryan Huntington, Ray-patrick Didder, Eric Mendez, Jiandido Tromp, Dwayne Kemp, Sicnarf Loopstok, Chadwick Tromp y Xander Bogaerts como tambe coachnan Calvin Maduro, Eugene Kingsale y Wim Martinus, tur clase di exito den e World Baseball Classic 2023.
Un danki tambe na e mayornan, famia amigo y conocirnan, coachnan, dirigentenan di baseball cu semper tabata tey pa awe e peloteronan por disfruta e gran momento aki.
Un pabien sigur na boso tambe.