260
DIOS TA BON DEN TUR MOMENTO
Hoben futbolista Jayroy Aparicio lo keda un temporada mas cu e gigantenan di Feyenoord, Rotterdam.
Noticia di deporte cu tur dia bo lo tin gana di haya pa drecha henter Aruba su weekend, siman y aña. Algun rato pasa nos di 297sports a haya e grato noticia for di Hulanda cu e hoben futbolista di Feyenoord, Jayroy Aparicio a haya su evaluacion final for di e Organisacion di Feyenoord y a keda escohi pa ta un temporada mas cu e ekipo di Rotterdam. Esaki kiermen tur mayor y hungador a wordo informa si nan lo sigui forma parti di e Organisacion di Feyenoord pa e campeonato nobo esta 2023/2024 y Jayroy ta un di nan cu lo keda.
Feyenoord a informa Jayroy y su mayornan Ale y Sue-Ann cu Jayroy lo pasa pa Bovenbouw esta U13, e temporada 2023/2024 cual lo bira Jayroy su di 7 temporada cu Feyenoord. Awor contrario na tur e aña nan anterior, Jayroy lo entrena parti mainta y despues bay scol.
Pa Jayroy, su famia y Aruba completo, un noticia super positivo unda nos ta wak un hoben di Aruba cu sosten di su famia trahando duro pa logra un soño tan anhela. For di dia 1 cu a cuminsa cu e aventura aki, mi persona a sigui di serca, Jayroy y famia Ale Aparicio y constantemente nos tin contacto pa loke ta e desaroyo na Hulanda di e hoben futbolista Arubano. Mas cu claro e ta yena nos di 297sports tambe cu orguyo pa mira Jayroy cada bez dal un stap mas serca di su meta. Na 2017, Jayroy Aparicio como hungador di e tricolornan di Solito, RCA a bandona Aruba hunto cu su famia pa sigui su carera den futbol.
Pabien Jayroy, su mayornan y su ruman cu ta e pilar nan tras di su exitonan. Jayroy a alegra Aruba su dia awe diabierna cu e tremendo noticia aki.
Cu Nos Bon Creador sigui iluminabo pa un dia bo logra yega bo meta esta hunga riba nivel profesional na Hulanda.