Gerencia di WEB a sera conoci cu e directiva nobo di Sport Vereniging WEB(Sv WEB)

Director, Alfredo Koolman a desea e directiva completo hopi exito cu e trabou. Expresando cu SV WEB ta haci un trabou importante pa stimula e bon atmosfera entre empleadonan, no solamente na pia di trabou pero tambe durante actividadnan social. Tur esaki SV WEB ta haci a base boluntario cual ta di aprecia. E empleadonan di WEB mes ta contribui via nan salario un suma tur luna pa asina realisa actividadnan di sport y social cu SV WEB ta organisa.

A establece SV WEB na maart 1971. Presidente actual di SV WEB, Miguel Cortes, a gradici gerencia di WEB pa e apoyo y a comunica cu nan ta aporta cu placer pa tur empleado di WEB. E tiki cu nos cada un ta duna por trece harmonia y positivismo.

Na aña 2002, bou di liderazgo di ex colega, Hubert Dirks, mihor conoci como ‘Moffy,’ a rebiba e organisacion y a formalisa statuut di SV WEB. Su meta tawata pa uni empleadonan di WEB pa medio di eventonan deportivo y social. Pa hopi aña ela presidi directiva di SV WEB. Bou di su presidencia a organisa e encuentro deportivo di mas grandi entre e companianan di Utilidad di nos islanan, esta EDCI cu te awe ta papia ariba e evento ey.

E actividadnan social y deportivo pa e aña aki ta prometedor. Hunto nos lo por haci nan un exito; door di participa na actividadnan, pero tambe door di presenta ideanan, duna sosten, y contribucion.

Empleadonan di WEB ta mustra nan interes di ta motiva, activo y den movecion pa un miho salud y ambiente social. Calidadnan cu lo yuda nan sigui brinda e miho servicio interno y externo.

Nos ta desea SV WEB hopi exito cu e trabou