E duet di landamento artistico, Kyra y Mikayla no lo mira accion awemainta den e Centro Aquatico na Chile. Ta asina algun dia atras, e atleta Kyra Hoevertsz a sufri un kebrante di salud cu tabata afecta su actuacion den awa seriamente. Despues di algun test haci, dokternan, den consulta cu e staf medico di Aruba, no a haye responsabel pa laga e atleta di Aruba competi na Santiago, mirando e intensidad di e deporte di landamento artistico y e resistencia fisico, sigur na e nivel mundial manera e Weganan Panamericano.
Den e siguiente dianan Kyra lo tin cu hasi algun test mas pa sigura cu no tin efecto negativo pa su salud.
Pa Kyra mes claro cu e momento aki ta duro y sigur tambe pa su compañera Mikayla y coach Tania, ya cu nan tin lunas ta preparando tur dia pa e evento aki. Esaki mester a bira nan momento pa briya. Pero e ta comprendibel tambe cu no por tuma riesgo y cu su salud ta na prome lugar.
Pa e delegacion di Aruba, esaki sin duda ta un momento tristo, ya cu e ta afecta tur presente pero tur hende ta den bon animo y ta apoya e duet Kyra y Mikayla. Faltando algun dia mas di competencia na e Weganan Panamericano e otro atletanan cu ainda falta pa competi awor ta concentra y preparando pa nan momento di accion.
E famia di Comite Olimpico Arubano ta desea Kyra Hoevertsz un pronto recuperacion y cu pronto e por ta bek den awa pa hunto cu Mikayla nan representa nos dushi isla.
