E marathonistanan; Ana Mujica, Edeline Weller, Esther Colina, Lili Mejia y Paulo Jordan ta cla pa biaha den e dianan venidero pa e ciudad di Berlin, Alemania pa participa den e famoso BMW Berlin Marathon 2023. E careda ta tuma luga diadomingo 24 di september na Berlin, Alemania.
E marathon aki ta forma parti di Abbott World Marathon Majors cu ta e caredanan di mas grandi y famoso di mundo. E seis ciudadnan cu ta forma parti di marathonnan mas grandi di mundo ta; Tokyo, Boston, London, Berlin, New York y Chicago. E coredonan; Ana, Edeline, Lili y Paulo ta forma parti di RunnersUnite Aruba y ta bou guia di e coach Sr. Vince Solognier cu a prepara nan durante varios siman a base di e plan di entrenamento “McMillan Running system”. E plan ta conisiti di cuater (4) “blocks” di cuater (4) siman cu un duracion total di diesseis (16) siman.
Cada “block” ta consisti di diferente fase esta; “Building up base”, “Strength”, “Speed” y “Endurance” cada un tin un meta specifico. Pa Ana esaki ta su di cuater (4) marathon; el a core Chicago 2021, New York 2022 y Rotterdam 2023. Pa Edeline esaki ta su di dos (2) marathon despues di a core Chicago na 2022. Pa Lili y Paulo esaki ta bira nan dos (2) marathon, ambos a core Rotterdam 2023. Esther ta un atleta di Viper Strong cu tambe a cumpli cu su entrenamento y ta cla pa core su di cinco (5) marathon. Ester a yega di participa den Miami 2022, Amsterdam 2022, Disney Marathon 2023 y Boston Marathon 2023.
E coredonan ta hopi contento cu e sosten cu nan a ricibi durante nan entrenamento y ta hopi motiva di por representa Aruba den e magno evento deportivo aki. E careda ta sali for di Brandenburg Gate, lo pasa Charlottenburg, sigui pa Tiergarten, Moabit & Mitte, ta continua pa zuid di Berlin; Friedrichshain bay direccion West Berlin Kreuzberg & Neukölln, Schöneberg, Friedenau, Zehlendorf y finalisa na Brandenburg Gate.
Importante ta pa remarca ta cu e coredonan “elite” internacional manera; Eliud Kipchoge, Amos Kipruto, Tigist Assefa y Sheila Chepkirui tambe ta participa den e marathon aki.
Pa conclui, RunnersUnite Aruba y 297Sports ta desea nos atletanan un bon biahe y tur clase di exito na Berlin, Alemania.
